அஜித் நடித்த 'நேர்கொண்ட பார்வை' திரைப்படம் கடந்த வியாழன் அன்று வெளியாகி மிகப்பெரிய வரவேற்பை பெற்ற நிலையில், இந்த படம் சென்னையில் கடந்த 3 நாட்களில் நான்கு கோடி ரூபாயும், தமிழகம் முழுவதும் 30 கோடி ரூபாய் வசூல் செய்ததாக செய்திகள் வெளியாகி வருகின்றன, இருப்பினும் இந்த செய்திகள் அதிகாரபூர்வமாக படக்குழுவினரால் அறிவிக்கப்பட்ட செய்தி அல்ல என்பது குறிப்பிடத்தக்கது.

இந்த நிலையில் 'நேர்கொண்ட பார்வை' திரைப்படம் அமெரிக்காவில் ஒரு மில்லியன் டாலர் வசூலித்ததாக இந்த படத்தின் தயாரிப்பாளர் போனி கபூர் தனது டுவிட்டர் பக்கத்தில் அதிகாரபூர்வமாக அறிவித்துள்ளார். அமெரிக்காவில் ஏற்கனவே செய்யப்பட்ட அனைத்து சாதனைகளையும் முறியடித்து மூன்றே நாட்களில் ஒரு மில்லியன் டாலர் வசூல் செய்ததாகவும் அவர் குறிப்பிட்டுள்ளார்.

தமிழகத்தில் மட்டுமின்றி வெளிநாடுகளிலும் இந்த படத்திற்கு மிகப்பெரிய வரவேற்பு இருந்துள்ளது என்பதை போனிகபூரின் இந்த டுவீட் மூலம் தெரியவருகிறது. இதனை அடுத்து தமிழக மற்றும் இந்திய வசூல் குறித்த தகவலை விரைவில் போனிகபூர் அறிவிப்பார் என்று எதிர்பார்க்கப்படுகிறது.

டுவிட்டர் டிராக்கர்கள் சிலர் இந்த படத்தின் வசூலை தங்கள் இஷ்டத்துக்கு கூறிவரும் நிலையில் போனி கபூர் தனது டுவிட்டரில் உண்மையான வசூலை தெரிவிக்கும் வரை பொறுமை காப்போம்.