`ఖైదీ నంబ‌ర్ 150`చిత్రంతో టాలీవుడ్‌లోకి రీ ఎంట్రీ ఇచ్చిన మెగాస్టార్ చిరంజీవి త‌న 151వ చిత్రానికి రంగం సిద్ధం చేసుకుంటున్నాడు. స్వాతంత్ర్య స‌మ‌రయోధుడు ఉయ్యాల‌వాడ న‌ర‌సింహారెడ్డిగా చిరంజీవి తెర‌పై క‌నిపించ‌నున్నారు. ఈ చిత్రాన్ని కొణిదెల ప్రొడ‌క్ష‌న్స్ బ్యాన‌ర్‌పై మెగాప‌వ‌ర్‌స్టార్ రాంచ‌ర‌ణ్ నిర్మిస్తున్నారు. సురేంద‌ర్ రెడ్డి ఈ సినిమాను డైరెక్ట్ చేస్తున్నాడు. ఈసినిమాకు సంబంధించిన ప్రీ ప్రొడ‌క్ష‌న్ ప‌నులు శ‌ర‌వేగంగా జ‌రుగుతున్నాయి.

అందులో భాగంగా చిరంజీవి స‌ర‌స‌న హీరోయిన్‌గా ఎవ‌రు న‌టిస్తార‌నే దానిపై ప‌లు వార్త‌లు విన‌ప‌డుతున్నాయి. మెగాస్టార్ స‌ర‌స‌న ఇద్ద‌రు బాలీవుడ్ హీరోయిన్ పేర్లు ప‌రిశీల‌న‌లో ఉన్నాయ‌ట‌. అందులో ఒక‌రు మాజీ మిస్ వ‌ర‌ల్డ్ ఐశ్వ‌ర్యారాయ్ కాగా మ‌రో పేరు విద్యాబాల‌న్‌. సురేంద‌ర్ రెడ్డి మాత్రం విద్యాబాల‌న్ అయితే క‌రెక్ట్‌గా ఉంటుంద‌ని భావిస్తున్నాడ‌ట‌. స‌ద‌రు హీరోయిన్స్‌ను యూనిట్ వ‌ర్గాలు సంప్ర‌దించే ప‌నిలో బిజీగాఉన్నాయి. సీనియ‌ర్ రైట‌ర్స్ ప‌రుచూరి బ్ర‌ద‌ర్స్ ఈ సినిమాకు సంబంధించిన స్క్రిప్ట్ వ‌ర్క్ అంతా పూర్తి చేసేశార‌ట‌. ఈ సినిమాలో హీరో శ్రీకాంత్ కూడా ఓ కీల‌క పాత్ర‌లో న‌టిస్తాడ‌ని స‌మాచారం. ఆగ‌స్టులో చిరంజీవి పుట్టిన‌రోజు సంద‌ర్భంగా ఈ సినిమాను స్టార్ట్ చేయాల‌ని ద‌ర్శ‌క నిర్మాత‌లు యోచిస్తున్నారు.