‘స‌లార్’ కోసం బాలీవుడ్ బ్యూటీ ఐటెం సాంగ్‌...
- IndiaGlitz, [Monday,February 08 2021]
రెబ‌ల్‌స్టార్ ప్రభాస్ ఇప్పుడు వ‌రుస‌గా ప్యాన్ ఇండియా సినిమాలు చేస్తోన్న సంగ‌తి తెలిసిందే. ఇప్ప‌టికే ‘రాధేశ్యామ్‌’ సినిమా షూటింగ్ ముగింపు ద‌శ‌లో ఉండ‌గా .. ‘స‌లార్, ఆదిపురుష్’అనే మ‌రో రెండు ప్యాన్ ఇండియా సినిమాల‌ను ప్రభాస్ సెట్స్ పైకి తీసుకెళ్లాడు. ఈ రెండింటిలో ‘స‌లార్’ విష‌యానికి వ‌స్తే.. ప్రభాస్, ప్ర‌శాంత్ నీల్ కాంబినేష‌న్‌లో రూపొందుతోన్న భారీ బ‌డ్జెట్ యాక్ష‌న్ మూవీ ఇది. ప్ర‌స్తుతం గోదావ‌రి ఖ‌నిలో చిత్రీక‌ర‌ణ‌ను జ‌రుపుకుంటోంది.
కాగా.. ఈ సినిమాలో ప్ర‌శాంత్ నీల్ త‌న‌దైన స్టైల్‌ను ఫాలో అవుతూ ఓ ఐటెమ్ సాంగ్‌ను ప్లాన్ చేశాడు. ప్యాన్ ఇండియా మూవీ కాబ‌ట్టి ఇందులో బాలీవుడ్ స్టార్ హీరోయిన్‌ను చిందేయిస్తే బావుంటుంద‌ని భావించాడ‌ట ప్ర‌శాంత్ నీల్. అందులో భాగంగా దీపికా ప‌దుకోన్‌ను సంప్ర‌దించార‌ని వార్త‌లు వినిపిస్తున్నాయి. ఎలాగూ ప్ర‌భాస్‌తో నాగ్ అశ్విన్ తెర‌కెక్కించ‌బోయే సినిమాలో దీపికా ప‌దుకోన్ హీరోయిన్. ఆ సినిమా కంటే ముందుగానే ఓ ఐటెమ్ సాంగ్‌లో న‌టించ‌డానికి దీపికా ఒప్పుకున్న‌ట్లు వార్త‌లు వినిపిస్తున్నాయి. మ‌రి ఈ వార్త‌ల‌పై చిత్ర‌యూనిట్ ఎలా స్పందిస్తుందో వేచి చూడాలి.