பிரமாண்ட இயக்குனர் ஷங்கர் இயக்கத்தில் உலக நாயகன் கமல்ஹாசன் நடித்த 'இந்தியன்' திரைப்படத்தில் இரண்டு நாயகிகளில் ஒருவராக நடித்தவர் ஊர்மிளா. பாலிவுட்டில் 'ரங்கீலா' உள்பட பல வெற்றி படங்களில் நடித்த இவரது திருமணம் நேற்று நடைபெற்றது.

காஷ்மீரை சேர்ந்த பிரபல தொழிலதிபரும் மாடலுமான Mohsin Akhtar அவர்களை நடிகை ஊர்மிளா நேற்று திருமணம் செய்து கொண்டார். மும்பையில் இந்த திருமணம் மிகவும் பிரமாண்டமாக நடைபெற்றதாகவும், இந்த திருமணத்திற்கு பாலிவுட் பிரபலங்கள் பலர் கலந்து கொண்டதாகவும் தகவல்கள் வெளியாகியுள்ளது.

சமீபத்தில்தான் பிரபல பாலிவுட் நடிகை ப்ரீத்தி ஜிந்தாவின் திருமணம் நடைபெற்று முடிந்த நிலையில் தற்போது இன்னுமொரு பிரபல நடிகையின் திருமணம் நடைபெற்றுள்ளது என்பது குறிப்பிடத்தக்கது.

கடந்த 1977ஆம் ஆண்டு குழந்தை நட்சத்திரமாக அறிமுகமான ஊர்மிளா, அதன் பின்னர் இந்தி, தமிழ், தெலுங்கு, மலையாளம் ஆகிய மொழிகளில் சுமார் 60 படங்களுக்கு மேல் நடித்துள்ளார். கமல்ஹாசனுடன் 'சாணக்கியன்' என்ற மலையாள படத்திலும் இந்தியன்' என்ற தமிழ்ப் படத்திலும் ஊர்மிளா நடித்துள்ளார் என்பது குறிப்பிடத்தக்கது.