கமல்ஹாசன் நடிப்பில் பிரமாண்ட இயக்குனர் ஷங்கர் இயக்கத்தில் உருவாகவிருக்கும் 'இந்தியன் 2' படத்தின் அடுத்தகட்ட படப்பிடிப்பு இம்மாதம் 19ஆம் தேதி தொடங்கவுள்ளது. இந்த படப்பிடிப்பிற்கு தேவையான அனைத்து பணிகளும் முடிந்துவிட்ட நிலையில் இந்த படத்தில் கடந்த சில நாட்களாக புதிய நட்சத்திரங்கள் இணைந்து வருகின்றனர்.

சமீபத்தில் 'இந்தியன் 2' படத்தில் பிரியா பவானிசங்கர், ஐஸ்வர்யா ராஜேஷ், ரகுல் ப்ரித்திசிங் உள்பட ஒருசில பெரிய நட்சத்திரங்கள் இந்த படத்தில் இணைந்த நிலையில் தற்போது இந்த படத்தில் பிரபல நடிகர் பாபிசிம்ஹா இணைந்துள்ளதாக கூறப்படுகிறது. பாபிசிம்ஹா இந்த படத்தில் வில்லன் கேரக்டரில் நடிக்கவிருப்பதாக தெரிகிறது. இந்த படத்தின் வில்லன் கேரக்டருக்கு ஏற்கனவே அர்ஜூன், அஜய்தேவ்கான் ஆகியோர் பரிசீலிக்கப்பட்டனர் என்பது தெரிந்ததே. பாபிசிம்ஹா தமிழ் சினிமாவில் ஹீரோ மற்றும் வில்லன் ஆகிய இரண்டுவிதமான கேரக்டர்களிலும் நடித்துள்ளார் என்பது தெரிந்ததே.

அனிருத் இசையில் ரத்தினவேலு ஒளிப்பதிவில், ஸ்ரீகர் பிரசாத் படத்தொகுப்பில் உருவாகவிருக்கும் இந்த படத்தை மிகப்பெரிய பட்ஜெட்டில் லைகா நிறுவனம் தயாரித்து வருகிறது.