మనిషికి ఆశ ఉండడం సహజం. కానీ అది అత్యాశగా మారినప్పుడే అనర్ధాలు జరుగుతాయి. అత్యాశ‌ప‌రుల‌ను టార్గెట్ చేసే ఓ వ్యక్తి కథతో త‌మిళంలో తెర‌కెక్కిన చిత్రం `చ‌తురంగ వేట్టై`. తమిళంలో ఘనవిజయం సాధించిన ఈ చిత్రం తెలుగులో `బ్ల‌ఫ్ మాస్ట‌ర్‌` పేరుతో రీమేక్ అవుతోంది. శ్రీదేవి మూవీస్ సంస్థ అధినేత శివ‌లెంక కృష్ణ‌ప్ర‌సాద్ ఈ చిత్రాన్ని స‌మ‌ర్పిస్తున్నారు. అభిషేక్ ఫిలిమ్స్ అధినేత ర‌మేష్ పిళ్లై ఈ చిత్రానికి నిర్మాత. గోపీ గ‌ణేష్ ప‌ట్టాభి దర్శకుడు. `జ్యోతిల‌క్ష్మి`, `ఘాజి` చిత్రాల ఫేమ్ స‌త్య‌దేవ్ హీరోగా నటించారు .

`ఎక్క‌డికి పోతావు చిన్నవాడా` చిత్రంతో తెలుగు ప్రేక్ష‌కులకు దగ్గరైన నందితా శ్వేత ఇందులో నాయిక‌. ఈ చిత్రాన్ని ముందుగా సెప్టెంబ‌ర్ 28న విడుద‌ల చేయాల‌ని యూనిట్ అనుకుంది. కానీ ఆల‌స్య‌మైంది. తాజాగా సినిమాను డిసెంబ‌ర్ 28న విడుద‌ల చేయ‌బోతున్న‌ట్లు అధికారికంగా ప్ర‌క‌టిస్తూ పోస్ట‌ర్‌ను విడుద‌ల చేశారు.