திருச்சி தோட்டா தயாரிக்கும் தொழிற்சாலையில் பயங்கர வெடிவிபத்து. 22 பேர் பலி
- IndiaGlitz, [Thursday,December 01 2016]
திருச்சி அருகே துறையூர் என்ற பகுதியில் இயங்கி வரும் தோட்டா தயாரிக்கும் தொழிற்சாலையின் ஒரு பகுதியில் சற்று முன் ஏற்பட்ட பயங்கர வெடி விபத்தில் இதுவரை 22 பேர் பலியானதாக செய்திகள் வெளிவந்துள்ளது. மேலும் தொழிற்சாலையில் இன்னும் பல தொழிலாளர்கள் சிக்கியுள்ளதால் பலி எண்ணிக்கை அதிகரிக்கும் என்று அஞ்சப்படுகிறது.
வெடிவிபத்து குறித்த தகவல் அறிந்தவுடன் 10 ஆம்புலன்ஸ் வாகனங்கள் மற்றும் 6 தீயணைப்பு வாகனங்கள் சம்பவ இடத்திற்கு விரைந்துள்ளன. தீ விபத்து நடந்த தொழிற்சாலையின் அருகே பொதுமக்கள் யாரையும் செல்ல காவல்துறை அனுமதிக்கவில்லை
இன்று காலை 7 மணி அளவில் இந்த விபத்து ஏற்பட்டதாகவும், சம்பவ இடத்தில் கற்கள் வெடித்து சிதறியதால் 20க்கும் மேற்பட்டோர் காயமடைந்ததாகவும், அவர்கள் அனைவரும் அருகில் உள்ள மருத்துவமனையில் சிகிச்சைக்காக அனுமதிக்கப்பட்டுள்ளதாகவும் அங்கிருந்து வரும் செய்திகள் தெரிவிக்கின்றன.
மேலும் இந்த பகுதியில் கடுமையான மழை பெய்து கொண்டிருப்பதால் மீட்பு பணிகளில் தாமதம் ஏற்பட்டுள்ளதாக தகவல்கள் வெளிவந்துள்ளது.