விஜய் வீட்டிற்கு காவி வேட்டி அனுப்பிய பாஜகவினர்!
- IndiaGlitz, [Monday,May 27 2019]
நடிகர் விஜய் வீட்டிற்கு பாஜகவினர் காவி வேட்டி அனுப்பியுள்ளதால் பெரும் பரபரப்பு ஏற்பட்டுள்ளது.
சமீபத்தில் நடந்த சினிமா நிகழ்ச்சி ஒன்றில் பேசிய நடிகர் விஜய்யின் தந்தை எஸ்.ஏ.சந்திரசேகர் அவர்கள், 'அரசியலில் 90 சதவிகிதம் பேர் திருடர்களாக இருப்பதாகவும், அரசியல்வாதிகள் யாரும் சினிமாவை காப்பாற்றுவதில்லை என்றும் சினிமாவை அழிக்கவே அவர்கள் திட்டம் போட்டுள்ளதாகவும் கூறினார். மேலும் அரசியல்வாதிகள் தமிழ் ராக்கர்ஸ் போன்ற இணையதளங்களுக்கு கூட்டாக செயல்படுகிறார்கள் என்ற சந்தேகம் உள்ளதாகவும், மக்களை திரட்டி இதுகுறித்து போராடினால் மட்டுமே அரசுக்கு சொரணை வரும் என்றும் ஆவேசமாக கூறினார். மேலும் தேர்தல் முடிவுக்கு பின்னர் மக்கள் அனைவரும் காவி வேட்டி கட்டிக்கொண்டு அலையப் போவதாகவும் இயக்குநர் எஸ்.ஏ.சந்திரசேகர், பாஜகவை மறைமுகமாக விமர்சனம் செய்திருந்தார்.
இதனையடுத்து அவருடைய வீட்டிற்கு இன்று ஒரு பார்சல் வந்திருந்தது. பாஜக திருப்பூர் தெற்கு மாவட்ட இளைஞர் அணி என்ற முகவரியில் இருந்து வந்திருந்த அந்த பார்சலில் ஒரு கடிதமும் ஒரு காவி வேட்டியும் இருந்தது. அந்த கடிதத்தில், 'முதல் தவணையாக காவி வேட்டி அனுப்பியுள்ளோம். இனி ஒவ்வொரு தவணையாக காவி வேட்டி அனுப்பிக் கொண்டே இருப்போம். ஏனென்றால், வாழ்நாள் முழுவதும் நீங்கள் காவி வேட்டியே அணிய வேண்டும் என்ற சூழ்நிலை ஏற்பட்டுள்ளது' என்ற எழுதப்பட்டுள்ளது.