விஜய் சேதுபதி நடித்த ’புரியாத புதிர்’ மற்றும் ஹரிஷ் கல்யாண் நடித்த ’இஸ்பேட் ராஜாவும் இதய ராணியும்’ ஆகிய படங்களை இயக்கியவர் ரஞ்சித் ஜெயக்கொடி. இவர் தற்போது அடுத்ததாக ஒரு திரில் மற்றும் சஸ்பென்ஸ் படத்தை இயக்க உள்ளார். இந்த படத்தில் பிக்பாஸ் நிகழ்ச்சியில் கலந்து கொண்ட போட்டியாளர்களில் ஒருவர் முக்கிய வேடத்தில் நடிக்க உள்ளார்.

‘கேடி பில்லா கில்லாடி ரங்கா’, ’தமிழுக்கு எண் ஒன்றை அழுத்தவும்’ மற்றும் கழுகு’போன்ற படங்களில் நடித்தவர் நடிகை பிந்து மாதவி. இவர் கமலஹாசன் தொகுத்து வழங்கிய பிக்பாஸ் நிகழ்ச்சியின் முதல் சீசனில் போட்டியாளர்களில் ஒருவராக கலந்து கொண்டு பெரும் பரபரப்பை ஏற்படுத்தியவர்.

இந்த நிலையில் தற்போது ரஞ்சித் ஜெயக்கொடி இயக்கவுள்ள அடுத்த படத்தில் நாயகியாக நடிக்க ஒப்பந்தம் செய்யப்பட்டுள்ளார். இந்த படத்தில் மேலும் ஒரு நாயகியாக நடிகை தனுஷா என்பவர் அறிமுகமாக இருப்பதாகவும், இரண்டு பெண்கள் தங்களுடைய மூதாதையர் சொத்தை விற்பதற்காக ஊட்டி வரும் போது அவர்களுக்கு ஏற்படும் பிரச்சினைகளும், அந்த பிரச்சனைகளை அவர்கள் எப்படி எதிர்கொள்கிறார்கள் என்பது தான் கதை என்றும் கூறப்படுகிறது.

இந்த படத்தின் படப்பிடிப்பு தற்போது ஊட்டியில் படமாக்கப்பட்டு வருகிறது என்றும், இந்த படம் குறித்த முழு விபரங்களை இன்னும் ஒரு சில நாட்களில் படக்குழுவினர் அதிகாரபூர்வமாக அறிவிக்க உள்ளார்கள் என்றும் செய்திகள் வெளிவந்துள்ளது.