ബിജു മേനോന്റെ റോസാപ്പൂ
- IndiaGlitz, [Monday,June 12 2017]
യുവതാരങ്ങൾക്കൊപ്പമുള്ള ബിജു മേനോന്റെ സ്ക്രീൻ രസതന്ത്രം ഓർഡിനറി, വെള്ളിമൂങ്ങ എന്നീ സിനിമകളിൽ പ്രേക്ഷകർ കണ്ടതാണ്. ഓർഡിനറിയിൽ കുഞ്ചാക്കോ ബോബനും വെള്ളിമൂങ്ങയിൽ അജു വർഗീസുമായിരുന്നു ബിജുവിന് കൂട്ട്. ഇപ്പോഴിതാ മറ്റൊരു യുവതാരം സണ്ണി വെയ്നുമായി ബിജു മേനോൻ കൈകോർക്കുന്നു.
രാജീവ് രവിയുടെ അസോസിയേറ്റായിരുന്ന വിനു ജോസഫ് സംവിധാനം ചെയ്യുന്ന റോസാപ്പൂ എന്ന സിനിമയിലാണ് ബിജുവും സണ്ണിയും ഒന്നിക്കുന്നത്. ഗ്രാമീണ പശ്ചാത്തലത്തിലുള്ള കഥ നർmmaത്തിൽ ചാലിച്ച് പറയുകയാണ് സംവിധായകൻ ഈ സിനിമിയിലൂടെ.
ബിജുവും സണ്ണിയും അവതരിപ്പിക്കുന്ന കഥാപാത്രങ്ങൾ ജീവിതത്തിൽ വളരെയേറെ കഷ്ടതകൾ അനുഭവിക്കുന്നതാണ്. മറ്റുള്ളവരുടെ മുന്പിൽ ഇരുവരും പരിഹാസ്യരാവുകയും ചെയ്യുന്നു. സൗബിൻ ഷാഹിറാണ് മറ്റൊരു പ്രധാന വേഷം അവതരിപ്പിക്കുക. അലൻസിയർ, സുധീർ കരമന, സംവിധായകൻ ദിലീഷ് പോത്തൻ എന്നിവരും സുപ്രധാന വേഷങ്ങളിലെത്തും.സന്തോഷ് ഏച്ചിക്കാനവും വിനുവും ചേർന്നാണ് തിരക്കഥ രചിക്കുന്നത്. കൊച്ചിയിലും ചെന്നൈയിലുമായാണ് സിനിമയുടെ ചിത്രീകരണം. ആഗസ്റ്റിൽ ഷൂട്ടിംഗ് തുടങ്ങും. പരസ്യരംഗത്തായിരുന്നു വിനു കൂടുതൽ സജീവമായിരുന്നത്. ഷിബു തമീൻസ് ആണ് ചിത്രത്തിന്റെ നിർമാണം.
ദുൽഖർ സൽമാന്റെ എ.ബി.സി.ഡി എന്ന സിനിമയ്ക്കു ശേഷം ഷിബു തമീൻസ് നിർമിക്കുന്ന രണ്ടാമത്തെ മലയാളചിത്രമാണിത്.