முன்கூட்டியே தொடங்கப்படுகிறதா பிக்பாஸ் தமிழ் சீசன் 7? கமல்ஹாசன் தொகுத்து வழங்குவாரா?
- IndiaGlitz, [Thursday,May 04 2023]
பிக்பாஸ் தமிழ் இதுவரை 6 சீசன்கள் முடிவடைந்த நிலையில் 7வது சீசன் இந்த ஆண்டு முன்கூட்டியே தொடங்கப்பட இருப்பதாக தகவல் வெளியாகியுள்ளன.
பிக்பாஸ் நிகழ்ச்சியின் ஆறு சீசன்களில் ஆரவ், ரித்விகா, முகின், ஆரி, ராஜு ஜெயமோகன் மற்றும் அசிம் ஆகிய ஆறு பேர் டைட்டில் வின்னர்களாக வெற்றி பெற்றுள்ளனர் என்பது தெரிந்ததே. இந்த நிலையில் கடந்த சில ஆண்டுகளாக கொரோனா வைரஸ் பாதிப்பு காரணமாக பிக்பாஸ் நிகழ்ச்சி அக்டோபர் மாதம் தொடங்கி ஜனவரி மாதம் முடிந்தது.
இந்த நிலையில் இந்த ஆண்டு கொரோனா வைரஸ் பாதிப்பு இல்லை என்பதால் வழக்கம் போல் ஜூன் மாதத்தில் தொடங்க வாய்ப்பு இருப்பதாக கூறப்படுகிறது. குறிப்பாக குக் வித் கோமாளி சீசன் 4 நிகழ்ச்சி தற்போது நடைபெற்று வரும் நிலையில் இந்த நிகழ்ச்சி முடிவடைந்ததும் பிக்பாஸ் நிகழ்ச்சி ஜூன் இறுதியில் அல்லது ஜூலையில் தொடங்கும் என்று எதிர்பார்க்கப்படுகிறது.
மேலும் இந்த நிகழ்ச்சிக்கான போட்டியாளர்கள் தேர்வு இன்னும் ஒரு சில நாட்களில் தொடங்கும் என்று கூறப்படுகிறது. இந்த நிலையில் கடந்த ஆறு சீசன்களை உலகநாயகன் கமல்ஹாசன் தொகுத்து வந்த நிலையில் ஏழாவது சீசனையும் அவர் தொகுத்து வழங்குவாரா? என்ற எதிர்பார்ப்பு ரசிகர் மத்தியில் உள்ளது. ஆனால் கமல்ஹாசன் தற்போது ’இந்தியன் 2’ படப்பிடிப்பில் பிஸியாக உள்ளார். இந்த படத்தை முடித்தவுடன் அவர் மணிரத்னம் இயக்கத்தில் உருவாகும் படம் உட்பட மூன்று படங்களில் கமிட்டாகி இருப்பதால் அவர் தொடர்ந்து பிக்பாஸ் நிகழ்ச்சியை தொகுத்து வழங்குவாரா? அல்லது அவருக்கு பதிலாக வேறு யாரேனும் தொகுத்து வழங்குவார்களா என்பதை பொறுத்திருந்து பார்ப்போம்.