'ருத்ரன்' படத்தின் பாடலை எழுதி பாடியவர் 'பிக்பாஸ் சீசன் 6' பிரபலமா?
- IndiaGlitz, [Wednesday,April 12 2023]
ராகவா லாரன்ஸ் நடிப்பில் உருவான ’ருத்ரன்’ திரைப்படம் வரும் தமிழ் புத்தாண்டு தினத்தில் திரையரங்குகளில் வெளியாக இருக்கும் நிலையில் இந்த படத்தில் இடம்பெற்ற பாடல் சமீபத்தில் வெளியாகி மிகப்பெரிய அளவில் வரவேற்பை பெற்று வருகிறது. இந்த நிலையில் இந்த பாடலை எழுதி பாடியவர் பிக்பாஸ் சீசன் 6 நிகழ்ச்சியில் கலந்து கொண்ட பிரபலம் என்பது தெரியவந்துள்ளது.
ராகவா லாரன்ஸ், பிரியா பவானி சங்கர், சரத்குமார் நடிப்பில் உருவான ’ருத்ரன்’ திரைப்படத்தை பிரபல தயாரிப்பாளர் கதிரேசன் இயக்கி உள்ளார். ஜிவி பிரகாஷ் இசையமைத்துள்ள இந்த படம் தமிழ், தெலுங்கு, மலையாளம், கன்னடம் என நான்கு மொழிகளில் ரிலீசாக உள்ளது. ’யூஏ’ சென்சார் சான்றிதழ் பெற்ற இந்த படத்தின் ரன்னிங் டைம் 150 நிமிடங்கள் என்றும் ஏற்கனவே செய்திகள் வெளியானது.
இந்த நிலையில் இந்த படத்தின் புரமோஷன் பணிகள் விறுவிறுப்பாக நடைபெற்று வரும் நிலையில் நேற்று சிங்கிள் பாடல் வெளியானது. இந்த பாடலை எழுதி பாடியவர் பிக் பாஸ் நிகழ்ச்சியில் கலந்து கொண்ட போட்டியாளர்களில் ஒருவரான அசல் கோலார் என்பது தெரியவந்துள்ளது.
ஜி வி பிரகாஷின் கம்போஸ் செய்த இந்த பாடலை அசல் கோலார் மற்றும் விக்கி ஆகியோர் இணைந்து பாடியுள்ளனர் என்பதும் இந்த பாடலை அசல் கோலார் எழுதியுள்ளார் என்பது குறிப்பிடத்தக்கது.