தமிழக பாஜக தலைவராக எல் முருகன் அவர்கள் தேர்வு செய்யப்பட்டதில் இருந்து திரையுலக நட்சத்திரங்கள் பலர் பாஜகவில் இணைந்து வருகின்றனர் என்பதை பார்த்து வருகிறோம். மேலும் விரைவில் நடிகை வனிதா உள்பட ஒருசில நட்சத்திரங்கள் பாஜகவில் இணைய இருப்பதாகவும் செய்திகள் வெளிவந்துள்ளன.

இந்த நிலையில் நடிகரும் கர்நாடக இசைக் கலைஞரும் பிக்பாஸ் தமிழ் சீசன் 3 போட்டியாளர்களில் ஒருவருமான மோகன் வைத்யா இன்று பாஜகவில் இணைந்துள்ளார். இன்று நடந்த ஒரு நிகழ்வில் தமிழக பாஜக தலைவர் முருகன் முன்னிலையில் மோகன் வைத்யா தன்னை பாஜகவில் நினைத்துக்கொண்டு பாஜகவின் அடிப்படை உறுப்பினர் அட்டையை பெற்றுக் கொண்டார். மேலும் பாஜகவில் இணைந்தது மகிழ்ச்சியளிக்கிறது என்றும், வரும் சட்டமன்றத் தேர்தலில் பாஜக நிச்சயமாக வெற்றி பெறும் என்றும் தாமரை மலர்ந்தே தீரும் என்றும், எல். முருகன் முன்னிலையில் கட்சியில் இணைந்த கர்நாடக இசைக்கலைஞர் மோகன் வைத்யா பேட்டி அளித்துள்ளார்.

ஏற்கனவே குஷ்பு, நமீதா, காயத்ரி ரகுராம், குட்டிபத்மினி, கங்கை அமரன், ராதாரவி உள்பட பல திரை நட்சத்திரங்கள் சமீபத்தில் பாஜகவில் இணைந்துள்ளனர் என்பது குறிப்பிடத்தக்கது.