பிக்பாஸ் நிகழ்ச்சியில் கலந்து கொண்டுள்ள போட்டியாளர்களில் ஒருவரான வனிதா மீது வழக்கு இருக்கின்றது என்பது அனைவரும் அறிந்ததே. ஆனால் நிகழ்ச்சியை பரபரப்பாக்க வேண்டும் என்பதற்காகவே பிக்பாஸ் திரைக்கதை அமைப்பாளர்கள் அவ்வப்போது பிக்பாஸ் வீட்டிற்குள் போலீஸ் நுழைவதாகவும், வனிதாவை விசாரணை செய்வதாகவும் செய்திகளை பரப்பி வருவதாக நெட்டிசன்கள் கூறி வருகின்றனர்.

இந்த நிலையில் வனிதாவை அடுத்து மீராமிதுன் மீதும் போலீஸ் நடவடிக்கை எடுத்திருப்பதாக செய்திகள் வெளிவந்துள்ளது. பிக்பாஸ் நிகழ்ச்சியில் பங்கேற்றுள்ள நடிகை மீரா மிதுனுக்கு போலீசார் சம்மன் அனுப்பியுள்ளதாக தெரிகிறது

ரூ 50 ஆயிரம் கொடுக்கல் வாங்கல் பிரச்சனை தொடர்பாக தி.நகரை சேர்ந்த ரஞ்சிதா என்பவர் கொடுத்த புகாரின் பேரில் விசாரணைக்கு ஆஜராக மீராமிதுனுக்கு போலீஸார் சம்மன் அனுப்பியுள்ளதாகவும், பிக்பாஸ் வீட்டில் இருந்து வெளியே வந்தவுடன் நேரில் ஆஜராகி இதுகுறித்து விளக்கம் அளிப்பதாக மீராமிதுன் தரப்பில் இருந்து சொல்லப்பட்டதாகவும் கூறப்படுகிறது.

முன்பெல்லாம் பிக்பாஸ் நிகழ்ச்சி, கமல் வரும் நாட்களில் மட்டுமே சுவாரஸ்யமாக இருக்கும். ஆனால் பிக்பாஸ் மூன்றாம் பாகத்தின் திரைக்கதையை வடிவமைத்து வருபவர்கள் ஆரம்பம் முதலே சுறுசுறுப்பாக செயல்பட்டு வருவதால் இந்த முறை நிகழ்ச்சி முதல் நாளில் இருந்தே பரபரப்புடன் நடந்து வருகிறது என்பது குறிப்பிடத்தக்கது