రెండో పెళ్లి చేసుకున్న తెలుగు బిగ్‌బాస్ కంటెస్టెంట్..
- IndiaGlitz, [Thursday,November 05 2020]
తెలుగు బిగ్‌బాస్ కంటెస్టెంట్ తాజాగా రెండోసారి పెళ్లి పీటలెక్కాడు. పంచాక్షరి, బావ, అహ నా పెళ్లంట వంటి తెలుగు సినిమాల్లో నటించి మంచి పేరు సంపాదించుకున్న నటుడు సామ్రాట్ రెడ్డి రెండో పెళ్లి చేసుకున్నాడు. బిగ్‌బాస్ 2 సీజన్‌లో పాల్గొని సామ్రాట్ లవర్ బాయ్‌గా పేరు తెచ్చుకున్నాడు. మొదటి భార్య హర్షిత రెడ్డికి సామ్రాట్ విడాకులు ఇచ్చిన విషయం తెలిసిందే. బిగ్‌బాస్ షోలో ఉన్నప్పుడే ఈ విడాకులకు సంబంధించిన కేసు నడిచిందని తెలుస్తోంది.
ఒకటి రెండు సార్లు బిగ్‌బాస్ షో నుంచి సామ్రాట్ బయటకు వెళ్లి వచ్చాడు. అది ఈ కేసు కోసమేనని టాక్. సామ్రాట్ రెడ్డి రెండో పెళ్లికి సంబంధించిన పిక్స్ ఇప్పుడు సోషల్ మీడియాలో వైరల్ అవుతున్నాయి. సామ్రాట్ సోదరి, మోడల్ శిల్పారెడ్డి సామ్రాట్‌కు సంబంధించిన కొన్ని పిక్స్‌ను తన ఇన్‌స్టాగ్రాంలో పోస్ట్ చేసింది. సామ్రాట్‌ను పెళ్లి కొడుకును చేస్తున్న వీడియోను సైతం శిల్పారెడ్డి పోస్ట్ చేసింది. దీంతో ఈ ఫోటోలు సోషల్ మీడియాలో బాగా వైరల్ అవుతున్నాయి.
కాగా.. సామ్రాట్ రెడ్డి.. శ్రీలిఖిత అనే యువతిని వివాహం చేసుకున్నట్టు శిల్పారెడ్డి సోషల్ మీడియా వేదికగా తెలిపింది. సామ్రాట్ వివాహం కాకినాడలో జరిగిందని సైతం ఆమె వెల్లడించింది. కరోనా నిబంధనల మేరకు వివాహ వేడుకంతా చాలా నిరాడంబరంగా సమీప బంధువుల సమక్షంలోనే జరిగింది. కాగా.. సామ్రాట్ పెళ్లికి బిగ్‌బాస్ సీజన్ 2 కంటెస్టెంట్ తనీష్‌తో పాటు పలువురు హాజరైనట్టు తెలుస్తోంది.