பிக்பாஸ் நிகழ்ச்சியின் முதல் பாகத்தில் இடம்பெற்றிருந்த போட்டியாளர்கள் அனைவருமே சினிமா மற்றும் தொலைக்காட்சிகளில் வாய்ப்புகள் பெற்றுள்ளனர். அந்த வகையில் பிக்பாஸ் நிகழ்ச்சியில் கலந்து கொண்ட ஹரிஷ் கல்யாண் மற்றும் ரைசா நடித்த 'பியார் பிரேமா காதல்' திரைப்படம் சமீபத்தில் வெளிவந்து நல்ல வரவேற்பை பெற்றதோடு இருவரின் நடிப்பும் பெரிதாக பேசப்பட்டது.

இந்த நிலையில் தேசிய விருது பெற்ற இயக்குனர் பாலா இயக்கி வரும் அடுத்த படமான 'வர்மா' படத்தில் 'பியார் பிரேமா காதல்' நாயகி ரைசா ஒரு முக்கிய கேரக்டரில் நடித்துள்ளார். இதுகுறித்து ரைசா கூறியபோது, 'பாலாவிடம் இருந்து அழைப்பு வந்ததும் இவ்வளவு பெரிய இயக்குனர் படத்தில் வாய்ப்பா? என்று ஆச்சரியம் அடைந்ததாகவும், அதே நேரத்தில் அவரை சந்திக்க கொஞ்சம் பயம் இருந்ததாகவும் கூறினார். மேலும் அவரை சந்தித்த பின்னர் மற்றவர்கள் கூறியதற்கு நேமாறாக அவர் மிகவும் கூலானவர் என்பதை புரிந்து கொண்டதாகவும் கூறினார்.

'வர்மா' படத்தில் தனக்கு சின்ன வேடம் தான் என்றும், ஒருசில நாட்களில் தனது காட்சிகளின் படப்பிடிப்பு முடிந்துவிட்டதாகவும் கூறிய ரைசா, இந்த படம் நிச்சயம் தனக்கு நல்ல பெயர் வாங்கி தரும் என்ற நம்பிக்கை இருப்பதாகவும் தெரிவித்தார்