'యువ‌కుడు' చిత్రంతో 17 ఏళ్ల క్రితం తెలుగు తెర‌కు క‌థానాయిక‌గా ప‌రిచ‌య‌మైన ఉత్త‌రాది భామ భూమికా చావ్లా.. రెండో తెలుగు చిత్రం 'ఖుషి'తో స్టార్ హీరోయిన్ అనిపించుకుంది. ఆ త‌రువాత 'ఒక్క‌డు', 'సింహాద్రి' వంటి సూప‌ర్ హిట్ చిత్రాల‌తో టాప్ హీరోయిన్‌గా ఎదిగింది. పెళ్ల‌య్యాక సినిమాల సంఖ్య త‌గ్గించుకున్న భూమిక‌.. తాజాగా 'ఎం.సి.ఎ' తో సెకండ్ ఇన్నింగ్స్ మొద‌లుపెట్టింది. గురువారం విడుద‌లైన ఈ సినిమాకి మిశ్ర‌మ స్పంద‌న వ‌చ్చినా.. వ‌సూళ్ల ప‌రంగా దూసుకుపోతోంది.

ఇక్క‌డి ఆస‌క్తిక‌ర‌మైన విష‌య‌మేమిటంటే.. భూమిక కెరీర్‌లో మ‌ర‌చిపోలేని చిత్ర‌మైన 'అన‌సూయ‌' విడుద‌లైన ప‌దేళ్ల త‌రువాత‌.. అదే తేది (డిసెంబ‌ర్ 21)కే ఆమె రీ ఎంట్రీ మూవీ 'ఎం.సి.ఎ' కూడా విడుద‌లైంది. అంటే.. డిసెంబ‌ర్ 21 భూమిక‌కి బాగా క‌లిసొచ్చింద‌న్న‌మాట‌. 'అన‌సూయ‌' హీరోయిన్ ఓరియెంటెడ్ మూవీ కాగా.. 'ఎం.సి.ఎ' లో నానికి వ‌దిన‌గా క‌థ‌కు కీల‌క‌మైన పాత్ర‌లో క‌నిపించింది భూమిక‌.

ఇదిలా ఉంటే.. నాగ‌చైత‌న్య హీరోగా రూపొందుతున్న స‌వ్య‌సాచిలోనూ భూమిక ఓ కీల‌క పాత్ర‌లో క‌నిపించ‌నుంది. చందు మొండేటి ద‌ర్శ‌క‌త్వంలో ఈ చిత్రం తెర‌కెక్కుతోంది. వ‌చ్చే ఏడాది వేస‌వికి ఈ సినిమా ప్రేక్ష‌కుల ముందుకు రానుంది.