పవర్ స్టార్ పవన్ కల్యాణ్ హీరోగా సాగర్ కె చంద్ర దర్శకత్వంలో తెరకెక్కుతున్న చిత్రం 'భీమ్లా నాయక్'. ఈ సినిమాకి స్టార్ రైటర్ త్రివిక్రమ్ శ్రీనివాస్ సంభాషణలు అందించడం విశేషం. ఈ మూవీలో రానా మరో కీలక పాత్ర పోషిస్తున్నాడు. పవన్ సరసన నిత్యామీనన్ కనిపించనుండగా, రానాకు జోడీగా సంయుక్త మీనన్ సందడి చేయనున్నారు.

సూర్యదేవర నాగవంశీ నిర్మిస్తున్న ఈ సినిమాను సంక్రాంతి కానుకగా 'జనవరి 12వ తేదీన విడుదల చేయనున్నట్టు మేకర్స్ ఇప్పటికే ప్రకటించారు. అయితే స‌డెన్‌గా రాజమౌళి ‘‘ ఆర్ఆర్ఆర్ ’’ జ‌న‌వ‌రి 7న విడుద‌ల కానుంద‌ని ప్ర‌క‌టించడంతో మ‌హేష్ బాబు వెన‌క్కు త‌గ్గాడు. ఏప్రిల్ లో సర్కారు వారి పాట విడుద‌ల చేయ‌బోతున్న‌ట్టు పేర్కొన్నాడు. దీంతో ప‌వ‌న్ సినిమా కూడా వాయిదా ప‌డుతుంద‌ని అంద‌రు అనుకున్నారు. ఫిబ్ర‌వ‌రిలో రిలీజ్ అవుతుందంటూ ప్ర‌చారం జ‌రిగింది. దీనిపై చిత్ర నిర్మాతలు స్పందించారు. తమ సినిమా వాయిదా పడటం లేదని చెబుతూనే, రిలీజ్ డేట్‌తో కలిపి పోస్టర్‌ను రిలీజ్ చేశారు మేకర్స్. దాంతో ఈ సినిమా ముందుగా అనుకున్న తేదీకే రావడం పక్కా అని తేలిపోయింది.

దీంతో సంక్రాంతి బ‌రిలో ఆర్ఆర్ఆర్, భీమ్లా నాయ‌క్, రాధే శ్యామ్ మధ్య గ‌ట్టి ఫైట్ ఉండ‌డం ఖాయంగా క‌నిపిస్తుంది. ఆర్ఆర్ఆర్, భీమ్లా నాయక్, రాధేశ్యామ్ మూడూ సంక్రాంతికి విడుదలయితే థియేటర్ల సమస్య తలెత్తడంతో పాటు వసూళ్లపైనా ప్రభావం చూపే అవకాశం వుంటుందని ట్రేడ్ వర్గాలు అంచనా వేస్తున్నాయి.