இசைஞானி இளையராஜாவின் மகளும் பாடகியுமான பவதாரணி நேற்று இலங்கையில் புற்றுநோய் காரணமாக காலமான நிலையில் அவரது உடல் இன்று மாலை சென்னை வரலாம் என்று எதிர்பார்க்கப்படுகிறது.

இசைஞானி இளையராஜாவின் மகள் பவதாரிணி கடந்த சில மாதங்களாக புற்றுநோயால் பாதிக்கப்பட்டிருந்த நிலையில் அவர் இலங்கையில் ஆயுர்வேத சிகிச்சைக்காக சென்றார். இந்த நிலையில் சிகிச்சை பலனின்றி அவரது உடல் மோசம் அடைந்த நிலையில் நேற்று மாலை உயிரிழந்தார். மறைந்த பவதாரணிக்கு வயது 47.

இந்த நிலையில் தற்போது கொழும்பில் உள்ள தனியார் மருத்துவமனையில் பவதாரிணி உடல் வைக்கப்பட்டுள்ளதாகவும் பிரேத பரிசோதனைக்கு பின்னர் அவரது உடல் குடும்பத்தாரிடம் ஒப்படைக்கப்படும் என்றும் கூறப்படுகிறது.

அதன் பின்னர் பவதாரிணி உடல் இலங்கையில் இருந்து இன்று மாலை சென்னைக்கு கொண்டுவரப்பட இருப்பதாகவும் சென்னையில் இறுதிச்சடங்கு நடைபெறும் என்று கூறப்படுகிறது. பவதாரிணிக்கு அஞ்சலி செலுத்துவதற்காக சென்னையில் திரையுலகினர் சோகத்துடன் காத்திருக்கின்றனர் என்பது குறிப்பிடத்தக்கது.