దక్షిణాది సినిమాల్లో హీరోయిన్‌గా పేరు తెచ్చుకున్న వారందరి చూపు బాలీవుడ్ వైపే ఉంటుంది. హిందీ సినిమాల్లో నటిస్తే జాతీయ స్థాయిలో పేరు తెచ్చుకోవచ్చు అనేది వారి ఆలోచన. అయితే ఆ అవకాశం అందర్నీ వరించదు. కానీ, కొంతమందికి మాత్రం తక్కువ సమయంలోనే బాలీవుడ్ సినిమాల్లో నటించే అవకాశం వస్తుంది. అలాంటి వారిలో హీరోయిన్ భావనారావు ఒకరు.

అతి తక్కువ సమయంలో బాలీవుడ్ నుంచి ఈ భామకు పిలుపు వచ్చింది. మాతృభాషైన కన్నడలో హీరోయిన్‌గా మంచి పేరు తెచ్చుకున్న భావన తమిళంలోనూ సినిమాలు చేసింది. ఈ భామ కన్నడంలో 2017లో నటించిన సత్యహరిచంద్ర చిత్రం ఆమెకు అభినందనలు, అవార్డులను తెచ్చిపెట్టింది.

ప్రస్తుతం శివరాజ్‌కుమార్, సుధీప్, ఎమీజాక్సన్ నటిస్తున్న ‘విలన్’ అనే చిత్రంలో ముఖ్య పాత్రను పోషిస్తోంది. ఇదిలా ఉంటే హిందీలో నీల్ నితిన్ ముఖేష్‌కు జంటగా 'బైపాస్ రోడ్' అనే చిత్రంలో నటించే అవకాశాన్ని దక్కించుకుంది భావన. నూతన సంవత్సరం తనకు చాలా ఆనందంగా ప్రారంభమైందని, తొలిసారిగా బాలీవుడ్‌కి ప్రవేశించడం చాలా సంతోషంగా ఉందని చెబుతోంది భావన.