கடந்த 2013ஆம் ஆண்டு சுசீந்திரன் இயக்கிய 'பாண்டியநாடு' படத்தில் விஷாலின் தந்தையாக மிக இயல்பாக தனது நடிப்பை வெளிப்படுத்திய இயக்குனர் இமயம் பாரதிராஜா, மீண்டும் இன்னொரு நடிகருக்கு தந்தையாக நடிக்க ஒப்பந்தம் செய்யப்பட்டுள்ளதாக கூறப்படுகிறது.

மைனா, காடு, வீரம் போன்ற படங்களில் நடித்த விதார்த், ஹீரோவாக நடிக்கும் இன்னும் பெயர் வைக்கப்படாத திரைப்படம் ஒன்றினை தனியார் தொலைக்காட்சி ஒன்றில் நடத்தப்பட்ட 'நாளைய இயக்குனர்' என்ற நிகழ்ச்சியில் வெற்றி பெற்ற முகிலன் என்பவர் இயக்கி வருகிறார். இந்த படத்தின் படப்பிடிப்பு சமீபத்தில் தொடங்கப்பட்டு சென்னை மற்றும் அதன் சுற்றுப்புறங்களில் நடைபெற்று வருகிறது.

இந்த படத்தில் விதார்த்துக்கு தந்தையாக அதே நேரத்தில் இதுவரை நடிக்காத முற்றிலும் வித்தியாசமான வேடத்தில் பாரதிராஜா நடிக்க உள்ளதாக கூறப்படுகிறது. 'பாண்டியநாடு' படத்தை போலவே இந்த படமும் அவருக்கு நல்ல விமர்சனத்தை பெற்றுத்தரும் என எதிர்பார்க்கப்படுகிறது.

மேலும் இந்த படத்தின் ஹீரோயின் தேர்வு நடைபெற்று வருவதாகவும், விரைவில் இந்த படம் குறித்த அறிவிப்பு வெளிவரும் என்றும் கூறப்படுகிறது. இந்த படத்தை அடுத்து விதார்த், உலா, விழித்திரு, குற்றமும் தண்டனையும் ஆகிய படங்களில் நடித்து வருகிறார்..