முன்னாள் முதல்வர் ஜெயலலிதாவின் வாழ்க்கை வரலாறு திரைப்படத்தை இயக்குனர் விஜய் இயக்கவுள்ளதாகவும், அதற்கான திரைக்கதையை அவர் தயார் செய்து வருவதாகவும் செய்திகள் வெளிவந்தது. 

இந்த நிலையில் இயக்குனர் இமயம் பாரதிராஜாவும் ஜெயலலிதாவின் வாழ்க்கை வரலாறு திரைப்படத்தை இயக்கவுள்ளதாகவும் செய்திகள் வெளிவந்துள்ளது. மேலும் இந்த படத்தை ஆதித்யா பரத்வாஜ் என்பவர் தயாரிக்கவுள்ளதாகவும் இசைஞானி இளையராஜா இசையமைக்கவுள்ளதாகவும் கூறப்படுகிறது.

ஏற்கனவே 'குற்றப்பரம்பரை' என்ற படத்தை பாரதிராஜாவும் பாலாவும் இயக்கவுள்ளதாக கூறப்பட்டது. பின்னர் இருவருக்கும் ஏற்பட்ட கருத்துமோதலினால் அந்த படத்தை இருவருமே தற்போதைக்கு கைவிட்டதாக தெரிகிறது. அதேபோல் தற்போது ஜெயலலிதா படத்தையும் இரண்டு இயக்குனர்கள் இயக்கவுள்ளதாக செய்திகள் வெளிவந்துள்ளது. ஜெயலலிதா என்பவர் அனைவருக்கும் பொதுவான ஒரு அரசியல் தலைவர், அவருடைய வாழ்க்கை வரலாறு படத்தை யார் வேண்டுமானாலும் இயக்கலாம், ஆனால் ஒரே நேரத்தில் இரண்டு பெரிய இயக்குனர்கள் இயக்க முன்வந்துள்ளதால் இந்த படம் சாத்தியமா? என்ற குழப்பம் தற்போது ஏற்பட்டுள்ளது.