பாரதிராஜாவால் அறிமுகமான நடிகர் இறந்துவிட்டதாக வதந்தி: வீடியோ வெளியிட்டு விளக்கம்..!
- IndiaGlitz, [Sunday,May 28 2023]
பாரதிராஜாவின் ’கிழக்கே போகும் ரயில்’ என்ற திரைப்படத்தில் அறிமுகமான நடிகர் சுதாகர் இறந்துவிட்டதாக சமூக வலைதளங்களில் வதந்தி கிளம்பிய நிலையில் தான் நலமுடன் இருப்பதாக வீடியோ வெளியிட்டு சுதாகர் விளக்கம் அளித்துள்ளார்.
கடந்த 1978 ஆம் ஆண்டு வெளியான ’கிழக்கே போகும் ரயில்’ என்ற படத்தில் தான் நடிகர் சுதாகர் மற்றும் நடிகை ராதிகா ஆகிய இருவருமே அறிமுகமாகினர். இதனை அடுத்து ’மனிதர்கள் இத்தனை நிறங்களா’ ’இனிக்கும் இளமை’ ’மாந்தோப்பு கிளியே’ ’பொண்ணு ஊருக்கு புதுசு’ ’நிறம் மாறாத பூக்கள்’ உள்பட பல படங்களில் ஹீரோவாக நடித்தார். அதன் தெலுங்கு திரையுலகில் பல படங்களில் அவர் காமெடி நடிகராகவும் நடித்தார் என்பது குறிப்பிடத்தக்கது.
இந்த நிலையில் நடிகர் சுதாகர் கடந்த சில மாதங்களாக உடல் நலக்குறைவு காரணமாக சிகிச்சை பெற்று வந்த நிலையில் திடீரென அவர் இறந்து விட்டதாக சமூக வலைதளங்களில் வதந்திகள் பரவியது.
இதனை அடுத்து நடிகர் சுதாகர் சமூக வலைதளங்களில் வீடியோ ஒன்றை வெளியிட்டு ’தன்னை பற்றி வெளிவந்து கொண்டிருக்கும் செய்திகள் பொய்யானவை என்றும் தான் நலமாகவும் மகிழ்ச்சியாகவும் உடல் நலத்துடன் இருப்பதாகவும் தெரிவித்துள்ளார்.