చంద్రబాబు నాయుడుకి, 'భరత్ అనే నేను' చిత్రానికి ఓ లింక్..
- IndiaGlitz, [Wednesday,February 28 2018]
'శ్రీ‌మంతుడు' వంటి విజ‌య‌వంత‌మైన చిత్రం త‌రువాత సూప‌ర్ స్టార్ మహేష్ బాబు, స‌క్సెస్‌ఫుల్ డైరెక్ట‌ర్ కొరటాల శివ కాంబినేష‌న్‌లో మ‌రో సినిమా రూపొందుతున్న విష‌యం తెలిసిందే. భరత్ అనే నేను' అనే పేరుతో రూపొందుతున్న ఈ సినిమాలో మహేష్ సమైఖ్యాంద్ర ముఖ్యమంత్రిగా కనిపించనున్నారు. బాలీవుడ్ న‌టి కైరా అద్వానీ క‌థానాయిక‌గా న‌టిస్తున్న ఈ చిత్రంలో శ‌ర‌త్ కుమార్, ప్ర‌కాష్ రాజ్ కీల‌క పాత్ర‌ల్లో న‌టిస్తున్నారు. దేవిశ్రీ ప్ర‌సాద్ సంగీత దర్శకుడు. డి.వి.వి.ఎంట‌ర్‌టైన్‌మెంట్స్ ప‌తాకంపై డి.వి.వి.దాన‌య్య నిర్మిస్తున్న ఈ చిత్రాన్ని ఏప్రిల్ 20న విడుద‌ల చేయ‌బోతున్నారు.
ఆస‌క్తిక‌ర‌మైన విష‌య‌మేమిటంటే.. ప్ర‌స్తుత ఆంధ్ర‌ప్ర‌దేశ్ ముఖ్య‌మంత్రి, ఒక‌ప్ప‌టి స‌మైఖ్యాంధ్ర ముఖ్య‌మంతి అయిన నారా చంద్రబాబు నాయుడు పుట్టిన రోజు కూడా ఏప్రిల్ 20నే కావడం. ఇది యాదృచ్ఛికంగా జరిగిన విషయమే అయినా.. ఈ చిత్రంలో చంద్రబాబు నాయుడుకి సంబంధించిన ఏవైనా అంశాలను టచ్ చేసుంటారేమోనని అభిమానుల్లో ఆసక్తి నెలకొంది. అంతేగాకుండా.. కొరటాల సామాజిక అంశాలపై సినిమాలను తెరకెక్కించడంలో దిట్ట. అందుకే ఈ ఆసక్తి తారాస్థాయికి పెరిగింది. మరి ఈ సినిమాలో ఏముందో తెలుసుకోవాలనుకుంటే.. ఏప్రిల్ 20 వరకు వేచి ఉండాల్సిందే.