கடந்த சில ஆண்டுகளாக சூப்பர் ஹிட் வெற்றி பெற்ற படங்களின் இரண்டாம் பாகங்கள் உருவாகி வருவது கோலிவுட்டில் டிரெண்டாகி வருகிறது. அந்த வகையில் கே.பாக்யராஜ் நடித்து இயக்கிய 'சின்னவீடு' படத்தின் இரண்டாம் பாகமும் விரைவில் தயாராகவிருப்பதாக செய்திகள் வெளிவந்துள்ளது.

கடந்த 1985ஆம் ஆண்டு கே.பாக்யராஜ், ஊர்வசி, அனு நடிப்பில் பாக்யராஜ் இயக்கத்தில் இளையராஜா இசையில் உருவாகிய 'சின்னவீடு' திரைப்படம் மிகப்பெரிய வெற்றிப்படமாக அமைந்தது. குண்டான மனைவியால் அதிருப்தி அடையும் கணவன் சபலத்தால் இன்னொரு பெண்ணுடன் தொடர்பு வைத்திருப்பதும், இதனால் ஏற்படும் விளைவுகளும்தான் இந்த படத்தின் கதை.

இந்த நிலையில் 33 வருடங்கள் கழித்து இந்த படத்தின் இரண்டாம் பாகத்தை உருவாக்கும் முயற்சியில் பாக்யராஜ் உள்ளார். 'சின்னவீடு 2' படத்திற்கான திரைக்கதையை பாக்யராஜ் தயார் செய்துவிட்டதாகவும் விரைவில் படப்பிடிப்பு தொடங்கும் என்றும் கூறப்படுகிறது. இந்த படத்தில் பாக்யராஜின் மகன் சாந்தனு ஹீரோவாகவும், பாக்யராஜ் முக்கிய கேரக்டரிலும் நடிப்பாரக்ள் என்று எதிர்பார்க்கப்படுகிறது. கடந்த 2010ஆம் ஆண்டு சாந்தனு நடித்த 'சித்து +2' படத்திற்கு பின் பாக்யராஜ் இயக்கும் படம் இது என்பது குறிப்பிடத்தக்கது.