സൂപ്പർ കപ്പ്‌ ഫെെനലിൽ ഇന്ന് ബംഗളൂരു എഫ്‌സിയും ഒഡിഷ എഫ്‌സിയും നേർക്കുനേർ
- IndiaGlitz, [Tuesday,April 25 2023] Sports News
സൂപ്പർ കപ്പ്‌ ഫെെനൽ കോഴിക്കോട് കോർപറേഷൻ സ്റ്റേഡിയത്തിൽ ഇന്ന് രാത്രി ഏഴിന്‌ നടക്കും. ബംഗളൂരു എഫ്‌സിയും ഒഡിഷ എഫ്‌സിയും തമ്മിലാണ്‌ ഫൈനൽ നടക്കുക. 2018 ൽ ആദ്യ സൂപ്പർ കപ്പിൽ ബംഗളൂരുവിനായിരുന്നു കിരീടം. 2019ൽ ഗോവ കപ്പ്‌ നേടി. പിന്നീട്‌ കോവിഡ്‌ കാരണം ടൂർണമെന്റ്‌ നടന്നിട്ടില്ല. ഐ.എസ്.എൽ ഫൈനലിസ്റ്റുകളായ ബംഗളൂരുവിന് ഇത് സീസണിലെ മൂന്നാം ഫൈനലാണ്. എന്നാൽ, ഒഡിഷ എഫ്.സിയെ സംബന്ധിച്ചിടത്തോളം സുപ്രധാനമായ ഒരു ടൂർണമെന്റിൻ്റെ ഫൈനലിൽ കടക്കുകയാണ്.
എ ഗ്രൂപ്പിൽ നിന്ന് ഒരു ജയവും രണ്ടു സമനിലയും അടക്കം അഞ്ചു പോയിന്റുമായാണ് സുനിൽ ഛേത്രി നയിക്കുന്ന ബംഗളൂരു സെമി ഫൈനലിൽ എത്തിയത്. സെമിയിൽ ജാംഷഡ്പുരിനെ മറുപടിയില്ലാത്ത രണ്ടു ഗോളിന് പരാജയപ്പെടുത്തി ഫൈനലിലുമെത്തി. സന്ദേഷ് ജിങ്കാൻ്റെ നേതൃത്വത്തിലുള്ള പ്രതിരോധനിരയാണ് ബംഗളൂരുവിൻ്റെ കരുത്ത്. എന്നാൽ, ബി ഗ്രൂപ്പിലെ മൂന്നു മത്സരങ്ങളും ആധികാരികമായി ജയിച്ച് ഒമ്പതു പോയന്റുമായാണ് ഒഡിഷ എഫ്.സി സെമിയിൽ കടന്നത്. അതിശക്തരായ നോർത്ത് ഈസ്റ്റിനെ 3-1ന് മലർത്തിയടിച്ചായിരുന്നു ഒഡിഷ ഫൈനൽ ബർത്തിൽ ഇടം പിടിച്ചത്.