‘పుష్ప.. పుష్పరాజ్‌.. జ‌వాబులు రాసేదే లే’.. టెన్త్ స్టూడెంట్ ఆన్సర్ షీట్‌ వైరల్, టీచర్‌కు షాక్
- IndiaGlitz, [Friday,April 08 2022]
సుకుమార్ దర్శకత్వంలో అల్లు అర్జున్ నటించిన ‘‘పుష్ప’’ సినిమా సృష్టించిన సంచలనాలు అన్ని ఇన్నీ కావు. ఈ సినిమాలోని పాటలు, డైలాగ్స్, ఫైట్స్‌ ప్రజలను విశేషంగా అలరించాయి. ఎక్కడ చూసినా పుష్ప పేరు బాగా వినిపించింది. వయసుతో సంబంధం లేకుండా ‘‘తగ్గేదే లే’’ అంటూ పుష్ప సినిమా డైలాగ్స్, అల్లు అర్జున్ మేనరిజాన్ని అనుకరించారు. వీరిలో సినీతారలు, క్రీడాకారులు చివరికి రాజకీయ నాయకులు కూడా వున్నారు. ముఖ్యంగా చిన్నారులైతే మెడ కిందగా చేతులు పోనిస్తూ నానా అల్లరి చేస్తున్నారు. ఇక ఐదు రాష్ట్రాల ఎన్నికల్లో పలు పార్టీలు ప్రచారానికి పుష్ప సినిమాను వాడుకున్నాయి. పుష్ప సినిమాను భాషతో సంబంధం లేకుండా దేశప్రజలు ఓన్ చేసుకొని సెలబ్రేట్ చేసుకొంటున్నారు.
తాజాగా ‘పుష్ప, పుష్పరాజ్‌.. జ‌వాబులు రాసేదే లే’.. అంటూ ఓ 10వ తరగతి విద్యార్థి ఏకంగా ఆన్సర్ పేపర్ మీద రాశాడు. అది కాస్తా ప్రస్తుతం వైరల్ అవుతోంది. పశ్చిమ బెంగాల్‌లోని సెకండరీ స్కూల్ పరీక్షల్లో ఈ ఘటన చోటు చేసుకుంది. ఇటీవ‌లే 10వ తరగతి ప‌రీక్ష‌లు ముగియడంతో ప్రస్తుతం రాష్ట్రవ్యాప్తంగా పేపర్ల మూల్యాంకనం జరుగుతోంది. ఈ నేపథ్యంలో పేపర్లు దిద్దుతోన్న ఓ మాస్టారు.. జవాబు ప‌త్రం మధ్యలో పెద్ద పెద్ద అక్ష‌రాల‌తో “పుష్ప, పుష్ప రాజ్... అపున్ లిఖేగా నహీ” అని రాసి ఉండడం చూసి అవాక్కయ్యాడు.
ఇకపోతే.. ప్రేక్షకులు పుష్ప పార్ట్‌ 2 కోసం ఆసక్తిగా ఎదురు చూస్తున్నారు. అయితే, మార్చి చివర్లో లేదా ఏప్రిల్లో పుష్ప 2 సినిమాకు సంబంధించిన షూటింగ్ ప్రారంభమవ్వాల్సి ఉండగా పలు కారణాల వల్ల పోస్ట్ పోన్ అయ్యాయి. ‘పుష్ప: ది రూల్’ జూన్ చివరలో లేదా.. జూలై ప్రారంభంలో సెట్స్‌పైకి వెళుతుందని ఫిలింనగర్ టాక్.