டெல்லி வன்முறை குறித்து சர்ச்சைக்குரிய விதமாக பேசிய அனுராக் தாக்கூர், கபில் மிஸ்ரா ஆகியோர் இருக்கும் கட்சியில் இனிமேலும் தன்னால் இருக்க முடியாது என பிரபல நடிகை ஒருவர் அக்கட்சியிலிருந்து விலகி உள்ளது பெரும் பரபரப்பை ஏற்படுத்தி உள்ளது.

சமீபத்தில் சிஏஏ சட்டத்திற்கு எதிராக டெல்லியில் நடைபெற்ற பேரணியில் பயங்கர வன்முறை ஏற்பட்டது. இந்த வன்முறையில் 40 பேர் அளவில் கொல்லப்பட்டார்கள் என்பது குறிப்பிடத்தக்கது. இந்த நிலையில் கடந்த 2013ம் ஆண்டு பாஜகவில் இணைந்த மேற்குவங்கத்தை சேர்ந்த பிரபல டிவி சீரியல் நடிகை சுபத்ரா அக்கட்சியில் இருந்து விலகுவதாக அறிவித்துள்ளார்.

இதுகுறித்து அவர் கூறியபோது ’டெல்லியில் நடைபெற்ற வன்முறை குறித்து சர்ச்சைக்குரிய வகையில் பாஜக தலைவர்கள் பேசி வருக்கின்றனர். குறிப்பாக கபில் மிஸ்ரா அனுராக் தாக்கூர் ஆகியோர் வன்முறையை தூண்டும் விதமாக பேசியதால், தான் மிகவும் அதிர்ச்சி அடைந்ததாகவும் இவர்கள் இருக்கும் கட்சியில் இனிமேல் தன்னால் இருக்க முடியாது என்பதால் அக்கட்சியிலிருந்து விலகுவதாகவும் தெரிவித்துள்ளார். பாஜக தலைவர்களின் பேச்சைக் கண்டித்து அக்கட்சியில் இருந்து நடிகை சுபத்ரா விலகி இருப்பது பெரும் பரபரப்பை ஏற்படுத்தி உள்ளது.