బెల్లంకొండ సాయి శ్రీనివాస్ ఇప్పుడు నిలిచి నిదానంగా స్టెప్పులేస్తున్నారు. ఇటీవ‌ల `రాక్ష‌సుడు` స‌క్సెస్‌తో ఆయ‌న ఆత్మ‌సంతృప్తితో ఉన్నారు. అంత‌కు ముందు ఆయ‌న చేసిన `సీత‌` అనుకున్నంత స‌క్సెస్ ఇవ్వ‌లేదు. అందుకే బెల్లంకొండ సాయి శ్రీనివాస్ న‌మ్మిన‌దాన్ని నిలిచి నిదానంగా చేస్తున్నారు. త‌మిళ చిత్రం `రాక్ష‌స‌న్‌` ఆధారంగా ర‌మేష్ వ‌ర్మ ద‌ర్శ‌క‌త్వంలో ఆయ‌న `రాక్ష‌సుడు`లో న‌టించిన సంగ‌తి తెలిసిందే. ఆ త‌ర్వాత సొంత ప్రొడ‌క్ష‌న్‌లో అయినా సినిమా చేయొచ్చు అని హింట్ ఇచ్చాడు బెల్లంకొండ‌.

తాజాగా ఆయ‌న త్రినాథ‌రావు న‌క్కిన ద‌ర్శ‌క‌త్వంలో ఓ సినిమా చేయ‌బోతున్నారు. సెన్సిటివ్ ప్రేమ‌క‌థ‌లు చేయ‌డంలో త్రినాథ‌రావ న‌క్కిన‌కు మంచి పేరు ఉంది. ఆయ‌న `హ‌లో గురు ప్రేమ కోస‌మే` సినిమా యువ‌త మ‌న‌సును దోచుకుంది. తాజాగా ఆ సెన్సిటివిటీస్‌, డ్రామా, ఎమోష‌న్‌, కాస్త యాక్ష‌న్ ఉండేలా ఆయ‌న ఓ స్క్రిప్ట్ చేశార‌ట‌. గ‌త కొన్నాళ్లుగా ఎలాంటి స్క్రిప్ట్ అయితే బావుంటుందా అని త్రినాథ్‌, శ్రీనివాస్ క‌లిసి ట్రావెల్ చేస్తున్నార‌ట‌. ఇటీవ‌ల ఓ స్క్రిప్ట్ ను లాక్ చేసిన‌ట్టు తెలిసింది. ప్ర‌స్తుతం స్క్రిప్ట్ డెవ‌ల‌ప్‌మెంట్ స్టేజెస్‌లో ఉంది. ఇంకొన్ని మాసాల్లోనే స్క్రిప్ట్ పూర్తిగా డెవ‌ల‌ప్ కానుంది.

దీని గురించి ఆయ‌న స‌న్నిహితులు మాట్లాడుతూ ``శ్రీను ఇప్పుడు దేనికీ తొంద‌ర‌ప‌డ‌టం లేదు. నిలిచి నిదానంగా నిర్ణ‌యాలు తీసుకుంటున్నాడు. త్రినాథ‌రావుతో గ‌త కొన్నాళ్లుగా ట్రావెల్ చేస్తున్నాడు. ఇటీవ‌ల ఓ స్క్రిప్ట్ లాక్ చేశాడు. ఇంకా న‌టీన‌టుల గురించి ఏమీ అనుకోలేదు. వాటి గురించి తెలియ‌గానే వెల్ల‌డిస్తాం`` అని అన్నారు. బెల్లంకొండ సురేష్ ఈ సినిమాను నిర్మిస్తార‌నే వార్త‌లు వ‌స్తున్నాయి. అభిషేక్ నామా కూడా ఈ సినిమాలో పార్ట్ న‌ర్ అయ్యే అవ‌కాశాలున్నాయ‌ని వినికిడి. త‌మిళ్‌కి కూడా స‌రిపోయేలా క‌థ‌ను సిద్ధం చేస్తున్నార‌ట‌.

ఆల్రెడీ త‌న అనువాద చిత్రాల‌తో నార్త్ లో ఫ్యాన్ బేస్ పెంచుకున్న బెల్లంకొండ శ్రీనివాస్‌, ఈ చిత్రంతో కోలీవుడ్ మీద క‌న్నేసే అవ‌కాశాలు ఎక్కువ‌గా క‌నిపిస్తున్నాయి.