బెజవాడ గుడిలో బాలయ్య అభిమానుల ప్రత్యేక పూజలు..!
- IndiaGlitz, [Saturday,November 26 2016]
నంద‌మూరి న‌ట సింహం బాల‌కృష్ణ నటిస్తున్న 100వ చిత్రం గౌతమీపుత్ర శాత‌క‌ర్ణి. ఈ చిత్రాన్ని జాగ‌ర్ల‌మూడి క్రిష్ తెర‌కెక్కిస్తున్నారు. అత్యంత ప్ర‌తిష్టాత్మ‌కంగా రూపొందుతున్న గౌతమీపుత్ర శాత‌క‌ర్ణి చిత్రాన్ని సంక్రాంతి కానుక‌గా రిలీజ్ చేసేందుకు ప్లాన్ చేస్తున్నారు. అయితే...బాలయ్య న‌ట ప్ర‌స్ధానంలో అత్యంత ప్ర‌తిష్టాత్మ‌క‌మైన చిత్రం గౌతమీపుత్ర శాత‌క‌ర్ణి ఘ‌న విజ‌యం సాధించాలని కోరుకుంటూ అభిమానులు భార‌త‌దేశంలోని 100 పుణ్య‌క్షేత్రాల‌ను ద‌ర్శించి ప్రత్యేక పూజలు చేయిస్తున్న విషయం తెలిసిందే.
అందులో భాగంగా బాలయ్య అభిమానులు ఈరోజు విజ‌య‌వాడ దుర్గ‌మ్మ గుడిలో ప్రత్యేక పూజలు చేయించారు. మంచి ప‌రిపాల‌న అందించిన చ‌క్ర‌వ‌ర్తిగా తెలుగు వారి చ‌రిత్ర‌లో చిర‌స్ధాయిగా నిలిచిన గౌత‌మీపుత్ర‌శాత‌క‌ర్ణి క‌థ‌ను తెరకెక్కించ‌డం, అది కూడా ఆంధ్ర‌ప్ర‌దేశ్ రాజ‌ధానిగా అమ‌రావ‌తిని ఎంపిక చేసిన త‌రుణంలో ఈ చిత్రం వ‌స్తుండ‌డంతో అభిమానులు సంతోషం వ్య‌క్తం చేస్తున్నారు.