பொங்கல் ரிலீஸ்.. 'விடாமுயற்சி' விலகியதால் 7 படங்கள் ரிலீஸா?
- IndiaGlitz, [Wednesday,January 01 2025]
அஜித் நடித்த ’விடாமுயற்சி’ திரைப்படம் பொங்கல் தினத்தில் ரிலீஸ் ஆகும் என்று எதிர்பார்க்கப்பட்ட நிலையில், நேற்று இரவு திடீரென தவிர்க்க முடியாத காரணத்தினால் பொங்கல் தினத்தில் இந்த படத்தை ரிலீஸ் செய்ய முடியவில்லை என லைகா நிறுவனம் அறிவித்தது. இதனால் அஜித் ரசிகர்கள் கடும் அதிருப்தியில் இருந்த நிலையில், பொங்கல் ரிலீஸில் இருந்து ’விடாமுயற்சி’ விலகியதால் கிட்டத்தட்ட ஏழு திரைப்படங்கள் பொங்கல் தினத்தில் ரிலீஸ் ஆக இருப்பதாக கூறப்படுகிறது.
ஏற்கனவே ஷங்கர் இயக்கிய ’கேம் சேஞ்சர் மற்றும் பாலா இயக்கிய ’வணங்கான்’ ஆகிய திரைப்படங்கள் பொங்கல் ரிலீஸ் என்று அறிவிக்கப்பட்டிருந்த நிலையில், தற்போது ’மெட்ராஸ் காரன்’, ’காதலிக்க நேரமில்லை’, ’தருணம்’ மற்றும் ’டென் அவர்ஸ்’ ஆகிய படங்கள் ரிலீசாக இருப்பதாக கூறப்படுகிறது.
இத்துடன் நீண்ட காலமாக ரிலீசுக்கு தயாராகி, ரிலீஸ் ஆகாமல் இருந்த வேல்ஸ் பிலிம்ஸ் இன்டர்நேஷனல் நிறுவனத்தின் ’சுமோ’ என்ற படமும் பொங்கல் ரிலீஸ் என்று கூறப்படுகிறது. அதுமட்டுமின்றி, விக்ரமின் ’வீர தீர சூரன்’ உள்பட, மேலும் சில படங்கள் ரிலீசாகுமா என்பதை பொறுத்திருந்துதான் பார்க்க வேண்டும்.