ఇప్పుడంటే వాట్సాప్, ఫేస్బుక్, ఇన్స్టాగ్రామ్.. చేతిలో స్మార్ట్ ఫోన్లు వీడియో కాల్స్, ఐఎంఓలు.. అబ్బో రకరకాల యాప్స్.. కానీ రెండు దశాబ్దాల క్రితం ఎలా ఉండేది? ప్రేమికులు ఒకరినొకరు ఎలా చూసుకునేవారు? ప్రేమ ఎలా ప్రవర్ధమానమయ్యేది? ఇష్టాయిష్టాలను ఒకరికొకరు ఎలా వ్యక్తం చేసుకునేవారు?.. 'ఖాకి' సినిమా చూస్తే తెలుస్తుంది. కార్తి, రకుల్ ప్రీత్సింగ్ జంటగా నటించిన చిత్రం 'ఖాకి'. హెచ్.వినోద్ దర్శకత్వం వహించారు.

ఈ సినిమాలో 1995-2005 మధ్య కాలంలో జరిగిన సన్నివేశాలను చూపించారు. పల్లెటూర్ల నుంచి ఉద్యోగాన్వేషణకు పట్టణాలకు వెళ్లిన యువకులు సెలవుల్లో తిరిగి వచ్చినప్పుడు పొరుగింటి అమ్మాయిలతో ప్రేమలో పడటం అనే కాన్సెప్ట్ అప్పట్లో అధికంగా ఉండేది. 'ఖాకి'లోనూ అలాంటి అంశాన్నే చూపించారు.

ఊరి నుంచి వచ్చిన అన్న చెల్లిని ఏడిపించడం, అన్న ప్రేమకు చెల్లి సాయం చేయడం, ఇరుగుపొరుగు ఇళ్లల్లో ఉన్న అమ్మాయి, అబ్బాయి ఒకరిని చూసి ఒకరు సైగలు చేసుకోవడం, పెద్దలకు తెలియకుండా కలుసుకోవడం వంటి విషయాలను చాలా సెన్సిటివ్గా తెరకెక్కించారు వినోద్. అప్పట్లో మార్కెట్లో హల్చల్ చేసిన రూ.500 సెల్ఫోన్ల ప్రస్తావన కూడా తీసుకొచ్చారు. ఎంత పవర్ఫుల్ పోలీస్ అయినా, వ్యక్తిగతంగా అతనికో జీవితం, అతని మనసుకో ప్రేమ, అందమైన కుటుంబం, ఆశలు, ఆకాంక్షలు.. అన్నీ ఉంటాయని చెప్పిన సినిమా ఇది.

'ఖాకి' లో చూపించిన ప్రేమ సన్నివేశాలతో ఇప్పటి మిడిల్ ఏజ్ పీపుల్ ఆటోమేటిగ్గా కనెక్ట్ అవుతున్నారు. తమ తల్లిదండ్రుల టీనేజ్లో లవ్స్టోరీలు ఇలా ఉండేవా? అని యువతరం కొత్తగా తెలుసుకుంటున్నారు. ఆదిత్య మ్యూజిక్ ప్రైవేట్ లిమిటెడ్ తెలుగులో అందించిన ఈ సినిమాకు ప్రేక్షకుల్లో చాలా మంచి స్పందన వస్తోంది. ఉమేష్ గుప్తా, సుభాష్ గుప్తా నిర్మాతలు. జిబ్రాన్ సంగీతాన్ని అందించారు.