தளபதி விஜய் நடித்து வரும் ‘பீஸ்ட்’ மற்றும் கார்த்தி நடித்து வரும் ‘சர்தார்’ ஆகிய இரண்டு படங்களின் படப்பிடிப்புகளும் ஒரே ஸ்டுடியோவில் நடைபெற்று வருவதாக தகவல் வெளிவந்துள்ளது. இதனால் விஜய் மற்றும் கார்த்தி சந்திக்க வாய்ப்பு இருப்பதாக கூறப்படுகிறது.

தளபதி விஜய் நடித்து வரும் ‘பீஸ்ட்’ படத்தின் படப்பிடிப்பு கடந்த சில நாட்களாக சென்னையில் உள்ள கோகுலம் ஸ்டுடியோவில் நடைபெற்று வருகிறது என்பதும் இந்த படப்பிடிப்பில் விஜய், பூஜா ஹெக்டே பாடல் காட்சிகளும் வேறு சில காட்சிகள் படமாக்கப்பட்டு வருவதாகவும் ஏற்கனவே வெளிவந்த தகவலை பார்த்தோம்.

இந்த நிலையில் இன்று முதல் இதே ஸ்டுடியோவில் கார்த்தி நடிக்கும் ‘சர்தார்’ படத்தின் படப்பிடிப்பு நடைபெற உள்ளது. இந்த படப்பிடிப்பில் அதிரடி ஆக்ஷன் சண்டை காட்சிகள் படமாக்கப்பட உள்ளதாகவும், இதற்கான ரிகர்சல் கடந்த சில நாட்களாக நடைபெற்றதாகவும் கூறப்படுகிறது.

பிஎஸ் மித்ரன் இயக்கும் இந்த திரைப்படத்தின் படப்பிடிப்பில் கார்த்தி உள்பட படக்குழுவினர் அனைவரும் கலந்து கொள்ள உள்ளனர். இந்த நிலையில் ஒரே ஸ்டூடியோவில் விஜய் மற்றும் கார்த்தி படங்களின் படப்பிடிப்பு அருகருகே நடைபெறுவதால் இருவரும் சந்தித்துப் பேச அதிக வாய்ப்பு இருப்பதாக கோலிவுட் வட்டாரங்கள் கூறுகின்றன.