தளபதி விஜய் நடித்த 'பீஸ்ட்’ படத்தில் நடித்த நடிகர் ஒருவர் பொது மக்களில் ஒருவரை தாக்கியதை அடுத்து அவர் படுகாயமடைந்து மருத்துவமனையில் சிகிச்சை பெற்று வருவதாக தகவல் வெளியாகி உள்ளது.

பிரபல மலையாள நடிகர் ஷான் டாம் சாக்கோ, தளபதி விஜய்யின் 'பீஸ்ட்’ என்ற திரைப்படத்தின் மூலம் தமிழ் சினிமாவில் அறிமுகமானார். நடிகர் ஷான் டாம் சாக்கோ மலையாளத்தில் 50க்கும் மேற்பட்ட படங்களில் நடித்துள்ள நிலையில் தற்போது டொவினோ தாமஸ் மற்றும் கல்யாணி பிரியதர்ஷன் நடிக்கும் ஒரு படத்தில் நடித்து வருகிறார்.

இந்த படத்தின் படப்பிடிப்பு கேரள மாநிலத்தில் நடந்து கொண்டிருந்த நிலையில் திடீரென அந்த பகுதி பொதுமக்கள் படப்பிடிப்பிற்கு எதிர்ப்பு தெரிவித்தனர். படப்பிடிப்பு காரணமாக அந்த பகுதியில் டிராபிக் பிரச்சினை ஏற்படுவதாகவும் எனவே படப்பிடிப்பை ரத்து செய்ய வேண்டும் என்றும் கோரிக்கை விடுத்தனர்.

இதுகுறித்த வாக்குவாதங்கள் முற்றிய நிலையில் நடிகர் ஷான் டாம் சாக்கோ திடீரென பொது மக்களில் ஒருவரை அடித்ததாகவும், இதனால் அவருக்கு படு காயம் ஏற்பட்டதையடுத்து மருத்துவமனையில் அனுமதிக்கப்பட்டுள்ளதாகவும் கூறப்படுகிறது. இது குறித்து தகவலறிந்த காவல்துறையினர் விரைந்து வந்து இரு தரப்பினரையும் சமாதானம் பேசி வைத்ததாக கூறப்படுகிறது.