క్రికెట్ లవర్స్‌కి గుడ్‌న్యూస్.. ఐపీఎల్ షెడ్యూల్ వచ్చేసిందోచ్, సన్‌రైజర్స్ ఫస్ట్ మ్యాచ్ ఆ జట్టుతోనే?
- IndiaGlitz, [Monday,March 07 2022]
క్రికెట్ ప్రేమికులు ఎప్పుడెప్పుడా అని ఎదురుచూస్తున్న ఐపీఎల్ 2022 షెడ్యూల్‌ను భారత క్రికెట్ నియంత్రణా మండలి (బీసీసీఐ) ఆదివారం ప్రకటించింది. మార్చి 26వ తేదీ నుంచి మే 29వ తేదీ వరకు 65 రోజుల పాటు ఐపీఎల్ 15వ సీజన్ జరగనుంది. 70 లీగ్ మ్యాచ్‌లు, నాలుగు ప్లే ఆఫ్ మ్యాచ్‌లు జరగనున్నాయి. మొత్తం పది జట్లు రెండు గ్రూపులుగా విడిపోయి .. ఒక్కొక్క జట్టు 14 మ్యాచ్‌లను ఆడనుంది. మార్చి 27 నుంచి రోజుకు రెండు మ్యాచ్‌లు జరుగుతాయని బీసీసీఐ తెలిపింది.
మార్చి 26వ తేదీన వాంఖడే స్టేడియంలో చెన్నై సూపర్ కింగ్స్, కోల్‌కతా నైట్‌రైడర్స్ మధ్య జరగనున్న మ్యాచ్‌తో ఐపీఎల్ 15వ సీజన్ ప్రారంభం కానుంది. మార్చి 27వ తేదీన టోర్నీలో మొదటి డబుల్ హెడర్ జరగనుంది. ఆరోజు సాయంత్రం 3.30కి జరగనున్న మ్యాచ్‌లో ఢిల్లీ క్యాపిటల్స్, ముంబై ఇండియన్స్ తలపడనున్నాయి. రాత్రి 7.30కి జరగనున్న మ్యాచ్‌లో పంజాబ్ కింగ్స్, రాయల్ చాలెంజర్స్ బెంగళూరు తలపడనున్నాయి.
ఇక సన్‌రైజర్స్ హైదరాబాద్ విషయానికి వస్తే.. మార్చి 29వ తేదీన రాజస్తాన్ రాయల్స్‌తో తొలి మ్యాచ్ ఆడనుంది. వాంఖడే, డీవై పాటిల్ స్టేడియాల్లో 20 చొప్పున.. బ్రాబోర్న్, ఎంసీఏ మైదానాల్లో పదిహేను చొప్పున మ్యాచ్‌లు నిర్వహిస్తామని.. మే 29 ఫైనల్ జరుగుతుందని బీసీసీఐ తెలిపింది.