ఇప్పటికే లతా మంగేష్కర్, నిన్న రాత్రి హీరో దీప్ సిద్ధూ మరణాల నుంచి కోలుకోకముందే భారతీయ చిత్ర పరిశ్రమలో మరో విషాదం చోటు చేసుకుంది. దిగ్గజ సంగీత దర్శకుడు, నేపథ్య గాయకుడు బప్పి లహిరి (69) కన్నుమూశారు. గత కొంతకాలంగా అనారోగ్యంతో బాధపడుతున్న ఆయన.. ముంబయిలోని ఓ ఆస్పత్రిలో చికిత్స పొందుతూ బుధవారం తెల్లవారుజమున తుదిశ్వాస విడిచారు. ఆయన మరణవార్త తెలుసుకున్న సినీ ప్రముఖులు, సంగీత ప్రియులు సోషల్ మీడియా ద్వారా సంతాపం తెలుపుతున్నారు.

1952లో పశ్చిమ బెంగాల్‌ రాష్ట్రంలోని జల్పాయ్‌గురి నగరంలో బప్పిలహిరి జన్మించారు. తల్లిదండ్రులిద్దరూ స్వతహాగా సంగీతకారులు కావడంతో బప్పిలహిరికి చిన్నప్పటి నుంచే సంగీతంలో ప్రావీణ్యం పొందారు. మూడేళ్ల వయసులోనే తబలా నేర్చుకున్నారు. అనంతరం మాతృభాష అయినా బెంగాలీతో పాటు బాలీవుడ్‌, టాలీవుడ్‌లో పలు చిత్రాలకు సంగీతం అందించారు. ‘డిస్కో డ్యాన్సర్‌’, ‘సాహెబ్‌’, ‘డ్యాన్స్‌ డ్యాన్స్‌’, ‘గురు దక్షిణ’, ‘కమాండో’, ‘గురు’, ‘ప్రేమ ప్రతిజ్ఞ’, ‘త్యాగి’, ‘రాక్‌ డ్యాన్సర్‌’, ‘ది దర్టీ పిక్చర్‌’, ‘బద్రినాథ్‌ కీ దుల్హనియా’ వంటి చిత్రాల్లో ఆయన అందించిన ట్యూన్ దేశాన్ని ఊపేశాయి.

బప్పిలహిరి ప్రతిభను గమనించిన సూపర్‌స్టార్‌ కృష్ణ తాను నిర్మించి దర్శకత్వం వహించిన ‘సింహాసనం’తో తెలుగు చిత్ర పరిశ్రమకు పరిచయం చేశారు. ఆ సినిమా పాటలు తెలుగు నాట సంచలనం సృష్టించడంతో ఆయనకు టాలీవుడ్‌లోనూ వరుస ప్రాజెక్ట్‌లు వరించాయి. ‘త్రిమూర్తులు’, ‘సామ్రాట్‌’, ‘స్టేట్ రౌడీ, ‘గ్యాంగ్‌ లీడర్‌’, ‘రౌడీ అల్లుడు’, ‘నిప్పు రవ్వ’, ‘బిగ్‌బాస్‌’ సినిమాలకు సంగీత దర్శకుడిగా, గాయకుడిగా పని చేశారు. ఇక ఆయన చివరిగా హిందీలో ‘భాఘి-3’కి సంగీతం అందించడంతో పాటు స్వరాలు సమకూర్చారు. రాజకీయాలపై ఆసక్తితో 2014లో ఆయన బీజేపీలో చేరారు.