ഐപിഎൽ 2023: പഞ്ചാബ് കിങ്സിനെ തകർത്ത് ബാംഗ്ലൂർ റോയൽ ചലഞ്ചേഴ്സ്
- IndiaGlitz, [Friday,April 21 2023] Sports News
ഐപിഎല്ലില്‍ ഇന്നലെ നടന്ന മത്സരത്തിൽ പഞ്ചാബ് കിംഗ്‌സിനെതിരെ ബാംഗ്ലൂര്‍ റോയല്‍ ചലഞ്ചേഴ്‌സിനു 24 റണ്‍സ് ജയം. ഈ വിജയത്തോടെ ബാംഗ്ലൂർ പോയന്റ് പട്ടികയിൽ അഞ്ചാം സ്ഥാനത്തെത്തി. ബാംഗ്ലൂർ ഉയർത്തിയ 175 റൺസ് വിജയ ലക്ഷ്യത്തിലേക്ക് ബാറ്റിങ് ആരംഭിച്ച പഞ്ചാബ് 18.1 ഓവറിൽ 150 റൺസിന് ഓൾ ഔട്ടായി. പത്ത് പന്ത് ശേഷിക്കെയാണ് ബാംഗ്ലൂരിൻ്റെ വിജയം. 30 പന്തില്‍ നിന്ന് 46 റണ്‍സ് നേടിയ പ്രഭ്‌സിമ്രാന്‍ സിംഗ് മാത്രമാണ് പഞ്ചാബ് നിരയില്‍ പൊരുതി നിന്നത്.
പ്രഭ്സിമ്രൻ സിംഗാണ് പഞ്ചാബിൻ്റെ ടോപ് സ്കോറർ. വിരാട് കോലിയും ഫാഫ് ഡൂപ്ലെസിയും ചേര്‍ന്ന് ഒരിക്കല്‍ കൂടി ആര്‍സിബിക്ക് തകര്‍പ്പന്‍ തുടക്കമിട്ടു, പവര്‍ പ്ലേയില്‍ ഇരുവരും ചേര്‍ന്ന് ആര്‍സിബിയെ 59 റണ്‍സിലെത്തിച്ചു. 31 പന്തില്‍ അര്‍ധ സെഞ്ചുറിയിലെത്തിയ ഡൂപ്ലെസിയാണ് തകര്‍ത്തടിച്ചത്. കോലിയും ഡുപ്ലെസ്സിയും സീസണിലെ നാലാം അർധസെഞ്ചുറിയാണ് കുറിച്ചത്. ബാംഗ്ലൂരിനായി മുഹമ്മദ് സിറാജ് തകർപ്പൻ ബൗളിങ് പ്രകടനം പുറത്തെടുത്തു. നാലോവറിൽ വെറും 21 റൺസ് മാത്രം വഴങ്ങിയ സിറാജ് നാല് വിക്കറ്റെടുത്തു. ഒരു റൺ ഔട്ടും സിറാജിൻ്റെ പേരിലായി.