త్రివిక్రమ్‌పై వ్యాఖ్యలు.. ఆ వాయిస్ నాది కాదు: ఆడియో టేప్ వివాదంపై బండ్ల గణేశ్ క్లారిటీ
- IndiaGlitz, [Tuesday,February 22 2022]
నిర్మాత, సినీనటుడు బండ్ల గణేశ్ మరోసారి వివాదంలో చిక్కుకున్నారు. పవర్‌స్టార్ పవన్ కల్యాణ్, రానా హీరోలుగా నటించిన భీమ్లా నాయక్ ప్రీ రిలీజ్ వేడుకకు త్రివిక్రమ్ తనను రాకుండా చేస్తున్నాడని.. తాను వస్తే త్రివిక్రమ్ డామినేట్ అయిపోతాడని ఆయనకు భయమంటూ బండ్ల గణేశ్ ఓ వ్యక్తితో ఫోన్‌లో మాట్లాడిన ఆడియో లీక్ అయ్యింది. త్రివిక్రమ్ వైసీపీ వాళ్ళతో కలిసి ఏదో ప్లాన్ చేశాడట...అందుకే భీమ్లా నాయక్ వేడుకకు నేను రావడం త్రివిక్రమ్‌కి ఇష్టం లేదని ఆ ఆడియోలో వ్యాఖ్యానించాడు. ఇదే సమయంలో త్రివిక్రమ్‌ను వాడు, వీడు అంటూ కొంచెం ఘాటు వ్యాఖ్యలు చేశాడు.
ఈ ఆడియో టేప్ వివాదంపై బండ్ల గణేష్ స్వయంగా స్పందించారు. వైరల్ అవుతున్న ఆ ఆడియో టేపులో ఉన్న వాయిస్ తనది కాదని స్పష్టం చేశారు. ఎవరో తనను ఇరికించడానికి కుట్రపూరితంగా దీనిని క్రియేట్ చేశారని బండ్ల గణేశ్ ఆరోపించారు. అయితే ఇదే స్టేట్మెంట్ అధికారికంగా ఇవ్వడానికి మాత్రం ఆయన నిరాకరించారు. ఈ నేపథ్యంలో అసలు ఆ కాల్ మాట్లాడింది బండ్ల గణేశేనా లేక వేరెవరైనా? అనే విషయంలో క్లారిటీ రాలేదు.
పవన్ కళ్యాణ్‌కు పరమ భక్తుడిగా చెప్పుకునే బండ్ల గణేశ్.. పవర్‌స్టార్ నటించిన మూవీ వేడుకలకు క్రమం తప్పకుండా పాల్గొంటారు. ఈ క్రమంలో బండ్ల గణేష్ స్పీచ్‌లకు రెస్పాన్స్ అలాగే వుంటుంది. పవన్ అభిమానులు సంబరపడిపోయేలా ఆయన చర్యలు ఉంటాయి. మరి తాజా వివాదం నేపథ్యంలో భీమ్లా నాయక్ ప్రీ రిలీజ్ ఈవెంట్‌కు బండ్ల గణేష్ హాజరవుతారో లేదో చూడాలి.