தளபதி விஜய் நடித்த 'மெர்சல்' படத்திற்கு அந்த படத்தின் தயாரிப்பு நிறுவனம் கோடிக்கணக்கில் புரமோஷனுக்காக செலவு செய்தது. ஆனால் அந்த புரமோஷன் செய்யாத பரபரப்பை தமிழக பாஜக தலைவர்கள் ஏற்படுத்தினார்கள். குறிப்பாக பாஜக தமிழக தலைவர் தமிழிசை மற்றும் அக்கட்சியின் தேசிய தலைவர் எச்.ராஜா ஆகிய இருவரை கூறலாம்.

மேலும் விஜய்யை ஜோசப் விஜய் என்று எச்.ராஜா கூறியதற்கு பின்னர் ஆயிரக்கணக்கான நபர்கள் தங்கள் பெயரின் முன்னாள் ஜோசப் என்று சமூக வலைத்தளங்களில் பதிவு செய்து வருகின்றனர்.

இந்த நிலையில் ஜெய், அஞ்சலி நடித்த 'பலூன்' பட இயக்குனர் சினிஷ், தனது சமூக வலைத்தளத்தில் கூறியதாவது: பலூன்னு ஒரு படம் வச்சிருக்கேன். புரமோஷனுக்கு காசு இல்லை, கொஞ்சம் பாத்து ஏதாச்சும் பண்ணுங்க சார்' என்று எச்.ராஜாவிடம் கிண்டலாக கூறியுள்ளார். இந்த டுவீட் தற்போது வைரலாகி வருகிறது. ஏற்கனவே நடிகர் மயில்சாமி, 'அரசியல்வாதிகள் மெர்சலுக்கு பிரச்சனை செய்தது போல் எல்லா படத்துக்கும் பிரச்சனை செய்தால் நல்லது' என்று கூறியிருந்தது நினைவிருக்கலாம்