నంద‌మూరి బాల‌కృష్ణ టైటిల్ పాత్ర‌లో న‌టిస్తూ ఎన్‌.బి.కె.ఫిలింస్ బ్యాన‌ర్‌పై నిర్మిస్తోన్న చిత్రం `య‌న్‌.టి.ఆర్‌`. ఈ బ‌యోపిక్‌లో తొలి భాగం `య‌న్‌.టి.ఆర్ క‌థానాయ‌కుడు` జ‌న‌వ‌రి 9న విడుద‌ల‌వుతుంది. క్రిష్ ద‌ర్శ‌క‌త్వంలో రూపొందుతోంది. ఈ సినిమా తొలి భాగంలో ఎన్టీఆర్ హీరోగా ఎదిగి ప్ర‌జ‌ల్లో హృద‌యాల్లో సుస్ధిర స్థానం సంపాదించుకున్న వైనాన్ని చూపించ‌బోతున్నారు. కాగా సినిమాల ప‌రంగా ఆయ‌న న‌టించిన హిట్ చిత్రాల్లో పాట‌ల‌ను, సన్నివేశాల‌ను కూడా చూపించ‌బోతున్నారు.

సినీ వ‌ర్గాల స‌మాచారం ప్ర‌కారం ఎన్టీఆర్ పాత్ర‌ధారిగా న‌టిస్తోన్న బాల‌కృష్ణ దాదాపు 60 గెటప్స్‌లో క‌నిపించ‌నున్నార‌ట‌. అందులో ఒక‌టి అల్లూరి సీతారామరాజు గెట‌ప్. ఈ లుక్‌ను నేడు విడుద‌ల చేశారు. తెలుగు ఇండ‌స్ట్రీలో అల్లూరి పాత్రలో న‌టించాల‌ని చాలా మంది హీరోలు అనుకున్నారు. అయితే అల్లూరి బ‌యోపిక్‌లో సూప‌ర్‌స్టార్ కృష్ణ న‌టించారు. `మేజ‌ర్ చంద్ర‌కాంత్‌` చిత్రంలో దివంగ‌త ఎన్టీఆర్ అల్లూరి పాత్ర‌ధారి పాట‌లో కనిపించారు. సాధార‌ణంగా అల్లూరి అంటే తెలుగులో ఎన్టీఆర్, కృష్ణ‌లే గుర్తొచ్చేంత‌లా వీరి ఆ పాత్ర‌లో ఒదిగిపోయారు. ఇప్పుడు ఆ పాత్ర‌లో బాల‌య్య క‌నిపించ‌బోతున్నారు.