గ‌త మూడేళ్ళుగా సంక్రాంతి సీజ‌న్‌లో త‌న సినిమాల‌తో సంద‌డి చేస్తున్నారు 'సంక్రాంతి క‌థానాయ‌కుడు'గా పేరు తెచ్చుకున్న‌ న‌ట సింహ బాల‌కృష్ణ‌. అంతేగాకుండా.. వ‌చ్చే ఏడాది కూడా ఆయ‌న సంక్రాంతికి సంద‌డి చేయ‌నున్నారు. ఆస‌క్తిక‌ర‌మైన విష‌య‌మేమిటంటే.. గ‌త రెండేళ్ళుగా త‌న సినిమాల‌తో పాటు మెగా హీరోల సినిమాలు సంక్రాంతి బ‌రిలో నిలిచాయి. వ‌చ్చే ఏడాది కూడా అదే రిపీట్ కాబోతోంది. కాస్త వివ‌రాల్లోకి వెళితే.. 2017లో నందమూరి బాలకృష్ణ 100వ చిత్రం ‘గౌతమిపుత్ర శాతకర్ణి’ సంక్రాంతి కానుక‌గా విడుదల అయి.. బాక్సాఫీస్ వద్ద కాసుల వర్షం కురిపించింది.

ఆ సినిమా విడుద‌ల‌కి ఒక రోజు ముందు మెగాస్టార్ చిరంజీవి నటించిన ‘ఖైదీ నంబర్ 150’ ప్రేక్షకుల ముందుకు వచ్చింది. చిరు కెరీర్‌లో 150వ చిత్రంగా, రీ-ఎంట్రీ ఫిల్మ్‌గా రూపొందిన ఈ సినిమా మంచి వసూళ్లను రాబట్టింది. అలాగే.. ఈ ఏడాది సంక్రాంతికి బాల‌య్య న‌టించిన‌ ‘జై సింహా’ తో పాటు పవర్ స్టార్ పవన్ కళ్యాణ్ నటించిన 25వ చిత్రం‘అజ్ఞాతవాసి’ విడుద‌ల‌యింది.

క‌ట్ చేస్తే.. వ‌చ్చే ఏడాది సంక్రాంతికి త‌న తండ్రి నంద‌మూరి తార‌క రామారావు బ‌యోపిక్ ‘యన్.టి.ఆర్’తో ప‌ల‌క‌రించ‌నున్నారు బాలకృష్ణ. అదే స‌మ‌యంలో రామ్ చ‌ర‌ణ్ హీరోగా బోయ‌పాటి తెర‌కెక్కిస్తున్న సినిమా విడుద‌ల కాబోతోంది. అంటే.. సంక్రాంతి సీజ‌న్‌లో వ‌రుస‌గా మూడేళ్ళ పాటు బాల‌య్య సినిమాల‌తో పాటు మెగా హీరోల సినిమాలు కూడా రిలీజ్ అవుతున్నాయ‌న్న‌మాట‌.

మెగా హీరోల‌తో బ‌రిలోకి దిగిన గ‌త రెండు సంద‌ర్భాల్లోనూ బాల‌య్య‌కు విజ‌యాలు వ‌రించాయి. వ‌చ్చే ఏడాది కూడా అది రిపీట్ అవుతుందేమో చూడాలి.