இயக்குனர் எஸ்எஸ் ராஜமவுலி இயக்கத்தில் பிரபாஸ், ராணா நடித்த ’பாகுபலி’ திரைப்படம் கடந்த 2015ஆம் ஆண்டு வெளியாகி மிகப்பெரிய வரவேற்பும் வசூலும் பெற்றது என்பது தெரிந்ததே. இதனை அடுத்து 2017ஆம் ஆண்டில் ’பாகுபலி’ படத்தின் இரண்டாம் பாகமும் வெளியானது என்பது குறிப்பிடத்தக்கது.

இந்த நிலையில் ’பாகுபலி’ படத்தில் ரம்யாகிருஷ்ணன் படத்தின் ஆரம்ப காட்சியில் ஒரு குழந்தையை கையில் வைத்து கொண்டு இவர் தான் மகிழ்மதி தேசத்தின் அடுத்த அரசன் என்று முழங்குவார் என்பதும், அதன்பின்னர் அந்த குழந்தையை காப்பாற்ற ஆற்றில் இறங்கி வருவார் என்பது தெரிந்ததே. அந்த குழந்தை பற்றிய தகவல் தற்போது வெளிவந்துள்ளது.

இந்த குழந்தையின் பெயர் ’தன்வி’ என்றும் இந்த குழந்தை தற்போது யுகேஜி படித்து வருவதாகவும் சமூக வலைத்தளத்தில் புகைப்படத்துடன் பதிவு செய்யப்பட்டுள்ளது. ’பாகுபலி’ படத்தில் கைக்குழந்தையாக நடித்த குழந்தை தற்போது நன்றாக வளர்ந்து சிறுமியாக இருக்கும் இந்த புகைப்படத்தை ’பாகுபலி’ படத்தின் ரசிகர்கள் ரசித்து வருகின்றனர் என்பதும், வைரலாகி வருகிறது என்பதும் குறிப்பிடத்தக்கது.