எஸ்.எஸ்.ராஜமெளலியின் 'பாகுபலி 2' படத்தின் டிரைலர் சற்று முன்னர் இணையதளங்களில் வெளிவந்து மிகப்பெரிய வரவேற்பை பெற்று வருகிறது. 'பாகுபலி' முதல் பாகத்தையே ஹாலிவுட் படங்களுக்கு இணையான பிரமாண்டம் என்று விமர்சிக்கப்பட்டு வந்த நிலையில் இந்த படம் அதனையும் தாண்டி ஹாலிவுட் படத்தையே மிஞ்சும் அளவுக்கு உள்ளது.

2 நிமிடம் 24 வினாடிகள் ஓடும் இந்த படத்தின் டிரைலர் கற்பனைக்கும் எட்டாத அளவில் உள்ளது. பிரமாண்டம் என்ற வார்த்தையையும் தாண்டி தமிழில் வேறு ஏதாவது வார்த்தைகள் இருக்கின்றதா? என்பதை யோசிக்க வைக்கின்றது. பாகுபலியை கட்டப்பா பின்னால் இருந்து வாளால் குத்தும் காட்சி, சிவகாமி ரம்யா கிருஷ்ணனின் கண்ணின் வழியும் கண்ணீர், கண்களில் இருந்து ரத்தம் வடியும் பாகுபலி பிரபாஸின் குளோசப் காட்சி, உலகில் இப்படி ஒரு இடம் இருக்குமா என்று எண்ணும் அளவிற்கு மலையும் அருவியும் அரண்மனையும் அமைந்துள்ள காட்சி, தமன்னாவின் சொக்க வைக்கும் அழகு, அனுஷ்காவின் கம்பீரம், அரண்மனையின் லாங் ஷாட், ராணாவின் ஆஜானுபாகுவான தோற்றம், முதல் பாக போர்க்காட்சியை இருமடங்கு பிரமாண்டம் என சொல்லிக்கொண்டே போகலாம்.

மேலும் எம்.எம்.கீரவாணியின் அபாரமான பின்னணி இசை, செந்தில்குமாரின் உலக தர ஒளிப்பதிவு, கோட்டகிரி வெங்கடேச ராவின் கச்சிதமான எடிட்டிங் என எந்த வகையிலும் குறை கண்டுபிடிக்கப்படாத டிரைலராக உள்ளது. இந்த படத்தின் டிரைலர் முழு படத்தையும் பார்க்க வேண்டும் என்ற தூண்டுதலை பல மடங்கு உயர்த்தியிருப்பது என்று கூறினால் அது மிகையில்லை. ஏப்ரல் 28ஆம் தேதி வெளியாகும் இந்த படத்தின் வசூல் இதுவரை இந்திய திரைப்பட வரலாறு சந்தித்திராத வசூலாக இருக்கும் என்று எதிர்பார்க்கப்படுகிறது. பாகுபலி 2 படகுழுவினர்களுக்கு நமது வாழ்த்துக்கள்.