பாகுபலி'யை கொலை செய்த கட்டப்பாவின் ரகசியம் தெரிந்த 4 பேர்
- IndiaGlitz, [Friday,August 26 2016]
பிரமாண்ட இயக்குனர் எஸ்.எஸ்.ராஜமெளலி இயக்கிய 'பாகுபலி' படம் கடந்த ஆண்டு வெளியானபோது படம் பார்த்தவர்களின் ஒவ்வொருவரின் மனதிலும் எழுந்த ஒரே கேள்வி ராஜவிசுவாசம் உள்ள கட்டப்பா ஏன் பாகுபலியை கொலை செய்தார்? என்பதுதான். இந்த கேள்விக்கு விடை தெரியாமல் கடந்த ஒரு வருடமாக இந்த படத்தை பார்த்த ரசிகர்கள் குழம்பி வருகின்றனர்.
இந்நிலையில் இந்த கேள்விக்கு விடையளிக்கும் முக்கிய காட்சிகள் சமீபத்தில் படமாக்கப்பட்டதாக கூறப்படுகிறது. ஆனால் இந்த படப்பிடிப்பு மிகவும் ரகசியமாக நடந்ததாகவும், இந்த ரகசியம் தற்போது நான்கு பேர்களுக்கு மட்டுமே தெரிந்துள்ளதாகவும் கூறப்படுகிறது.
எஸ்.எஸ்.ராஜமெளலி, இந்த படத்தின் கதாசிரியரும் ராஜமெளலியின் தந்தையுமான விஜயேந்திர பிரசாத், பிரபாஸ் மற்றும் சத்யராஜ் ஆகிய நால்வர்தான் இந்த ரகசியம் தெரிந்தவர்கள் என்று கூறப்படுகிறது. இன்னும் பின்னணி இசையமைப்பாளர் மற்றும் எடிட்டருக்கு தெரிய வாய்ப்பு உள்ளது. இவர்களை தவிர இந்த ரகசியம் வேறு யாருக்கும் தெரியாது என்பதால் இந்த ரகசியத்தை தெரிந்து கொள்ள 2017 ஆம் ஆண்டு ஏப்ரல் வரை பொறுத்திருக்க வேண்டும் என்பதை தவிர வேறு வழியில்லை.