అజారుద్దీన్‌కు తృటిలో తప్పిన ప్రమాదం..
- IndiaGlitz, [Wednesday,December 30 2020]
భారత క్రికెట్ జట్టు మాజీ కెప్టెన్, హైదరాబాద్ క్రికెట్ అసోసియేషన్ అధ్యక్షుడు మహమ్మద్ అజారుద్దీన్ బుధవారం ఉదయం కారు ప్రమాదానికి గురయ్యారు. అయితే ఈ ప్రమాదంలో ఆయన తృటిలో ప్రాణాపాయం నుంచి తప్పించుకుని స్వల్ప గాయాలతో అజారుద్దీన్ బయటపడినట్టు ఆయన వ్యక్తిగత సహాయకుడు తెలిపారు. తన కుటుంబ సభ్యులతో కలిసి నూతన సంవత్సర వేడుకల కోసం అజారుద్దీన్ రాజస్థాన్ వెళ్లారు.
ఈ క్రమంలోనే ఆయన రణ్‌తంబోర్‌లోని జాతీయ పార్కుకు వెళుతుండగా తను ప్రయాణిస్తున్న కారు ప్రమాదానికి గురైంది. తిరిగి వస్తుండగా రాజస్థాన్‌లోని సూర్వల్ వద్ద లాల్సాట్-కోట హైవేపై ఈ ప్రమాదం చోటుచేసుకుంది. ప్రమాదంలో కారు బోల్తా పడింది. ప్రమాద సమయంలో అజార్‌తో పాటు కారులో మరో ముగ్గురు ఉన్నారు. ప్రమాదం నుంచి వెంటనే తేరుకున్న అజారుద్దీన్ వేరే కారులో హోటల్‌కు బయలుదేరారు. ఈ ప్రమాదంలో అజార్‌కు స్వల్ప గాయాలయ్యాయి.