தேசிய விருது பெற்ற இயக்குனர் பாலா இயக்கத்தில் ஆர்யா, விஷால், ஜனனி ஐயர் நடிப்பில் கடந்த 2011ஆம் ஆண்டு வெளிவந்த திரைப்படம் 'அவன் இவன்'. இந்த படம் ரசிகர்களிடையே நல்ல வரவேற்பை பெற்ற நிலையில் இந்த படத்தில் சிங்கம்பட்டி ஜமீன் குறித்து தவறாக சித்தரித்ததாகவும் சொரிமுத்து அய்யனார் கோவில் பற்றியும் அவதூறாக கூறியிருந்ததாகவும் அம்பாசமுத்திரம் நீதிமன்றத்தில் சிங்கம்பட்டி ஜமீன் வாரிசு ஒருவர் வழக்கு தொடர்ந்தார்.

இந்த வழக்கில் நடிகர் ஆர்யா மற்றும் இயக்குநர் பாலா ஆகிய இருவரும் நீதிமன்றத்தில் ஆஜராகி தங்கள் தரப்பு வாதத்தை வைத்தனர் என்பது குறிப்பிடத்தக்கது. இந்த நிலையில் இன்று இந்த வழக்கின் தீர்ப்பு வெளியாகவிருந்ததை அடுத்து இயக்குநர் பாலா அம்பாசமுத்திரம் குற்றவியல் நடுவர் நீதிமன்றத்தில் நேரில் ஆஜரானார்.

இந்த நிலையில் சிங்கம்பட்டி ஜமீன் பற்றியும், சொரிமுத்து அய்யனார் கோவில் பற்றியும் அவதூறாக ’அவன் இவன்’ படத்தில் காட்சிகள் சித்தரிக்கப்பட்டதாக தொடர்ந்த வழக்கில் இருந்து இயக்குனர் பாலா விடுவிக்கப்பட்டதாக நீதிமன்றம் சற்றுமுன் தீர்ப்பு அளித்துள்ளது.