ഗവർണറുടെ വാഹനത്തിനു നേരെ ആക്രമണ ശ്രമം
- IndiaGlitz, [Saturday,July 29 2023]
ഗവർണർ ആരിഫ് മുഹമ്മദ്‌ ഖാന് നേരെ ആക്രമണ ശ്രമം. ഗവർണറുടെ വാഹനത്തിലേക്ക് മറ്റൊരു കാര്‍ ഇടിച്ചു കയറ്റാൻ ശ്രമിച്ചു. വെള്ളിയാ‍ഴ്ച രാത്രി നോയിഡയിൽ നിന്നും ദില്ലിയിലെ കേരള ഹൗസിലേക്കുള്ള യാത്രയ്ക്കിടെ ആണ് സംഭവം. കറുത്ത സ്ക്കോർപിയോ കാറാണ് ഇടിച്ചു കയറ്റാൻ ശ്രമിച്ചത്. സംഭവത്തില്‍ കാറിലുണ്ടായിരുന്ന രണ്ടു പേരെ യുപി പൊലീസ് അറസ്റ്റ് ചെയ്തു.
യുപി സ്വദേശികളായ മോനു കുമാർ, ഗൗരവ് എന്നിവരാണ് പിടിയിലായത്. ഇവർ മദ്യ ലഹരിയിൽ ആയിരുന്നെന്നാണ് സൂചന. കേസ് റജിസ്റ്റർ ചെയ്തെന്നും അന്വേഷണം നടക്കുകയാണെന്നും യുപി പൊലീസ് അറിയിച്ചു. ഗവർണറുടെ വാഹനത്തെ പിന്തുടർന്ന് റോങ്ങ് സൈഡിലൂടെ മറ്റ് വാഹനങ്ങളെ മറികടന്ന് ഗവർണറുടെ വാഹനത്തിലേക്ക് ഇടിച്ചു കയറ്റാനായിരുന്നു അവർ ശ്രമിച്ചത്. എന്നാൽ, ഗവർണറിനൊപ്പം ഉണ്ടായിരുന്ന സുരക്ഷാ ഉദ്യോഗസ്ഥരുടെ കൃത്യമായ ഇടപെടൽ അപകടം ഒഴിവാക്കുകയായിരുന്നു.