రిపబ్లికన్ టీవీ ఎడిటర్ అర్నబ్ గోస్వామిపై బుధవారం అర్థరాత్రి దాడి జరిగింది. ముంబైలోని టీవీ చానెల్ స్టూడియో నుంచి తన భార్యతో కలిసి ఇంటికి వెళ్తున్న సమయంలో కొందరు వ్యక్తులు ఆయన కారుపై రసాయనాలు పోసి దాడి చేశారు. అయితే ఈ దాడికి కారణం ఇటీవల ఆయన కాంగ్రెస్ అధినేత్రి సోనియాగాంధీ గురించి చేసిన డిబేటే అని తెలుస్తోంది. ఈ ఘటనపై ఓ వీడియోను అర్నబ్ విడుదల చేశారు. యూత్ కాంగ్రెస్ కార్యకర్తలే తనపై దాడికి కారణమని ఆరోపించారు.

అసలేం జరిగింది..!?

రాత్రి 12:15 గంటల సమయంలో ఛానెల్ నుంచి ఇంటికి బయలుదేరగా.. మా కారును రెండు బైక్‌లు వెంబడించాయి. మా కారుకు క్రాస్ చేస్తూ నడుపుతూ వారు కారులోకి తొంగిచూశారు. ఆపై ఓవర్ టేక్ చేసి, రోడ్డుకు అడ్డంగా బైక్‌లను ఆపారు. వారి నుంచి తప్పించుకునేందుకు నేను కారును ఆపకుండా పోనిస్తుంటే.. కారు అద్దాలను పగులగొట్టేందుకు ప్రయత్నించారు. ఏదో ద్రావకం ఉన్న సీసాలను మా కారుపై విసిరేశారు. ఆ వెంటనే నేను కారును మరింత వేగంగా డ్రైవ్ చేశాను. నా కారు వెనకే వస్తున్న సెక్యూరిటీ సిబ్బంది వారిని పట్టుకున్నారు. నా సెక్యూరిటీ సిబ్బందితో మాట్లాడగా, యూత్ కాంగ్రెస్‌కు చెందిన కార్యకర్తలు దాడికి యత్నించారు’ అని అర్నబ్ ఆ వీడియోలో చెప్పుకొచ్చారు. పోలీసు స్టేషన్‌లో తాము ఫిర్యాదు చేశామని.. ఈ దాడికి సోనియా బాధ్యత వహించాలని డిమాండ్ చేశారు.

భారత్‌లో ఉండటం బాధాకరం..

అర్నబ్‌పై దాడి ఘటన ప్రస్తుతం జాతీయ మీడియాలో.. ఇటు సోషల్ మీడియాలో పెద్ద ఎత్తున హాట్ టాపిక్ అయ్యింది. అయితే ఈ దాడిని కొంత మంది మాత్రమే ఖండిస్తున్నప్పటికీ.. చాలా వరకు ఇది సబబే అని నెటిజన్లు, కాంగ్రెస్ కార్యకర్తలు తీవ్రస్థాయిలో విమర్శలు గుప్పిస్తున్నారు. ఈ ఘటనపై కాంగ్రెస్ సీనియర్ నేత జేడీ శీలం స్పందిస్తూ.. సోనియాపై అర్నాబ్‌ వాడిన భాష సరిగా లేదని వ్యాఖ్యానించారు. ఇలాంటి ఆరోపణలు అర్నాబ్‌ మానుకోవాలన్నారు.

జర్నలిజం అంటే పార్టీ కోసం పనిచేయడం కాదని.. అర్నాబ్‌లాంటి వారు భారత్‌లో ఉండడం దురదృష్టకరమని శీలం వ్యాఖ్యానించారు.