விஜய்க்கு அடுத்த இடத்தில் பிரபாஸ். 'பாகுபலி 2' விழாவில் வெளியான ரகசியம்
- IndiaGlitz, [Wednesday,March 29 2017]
பிரபல தெலுங்கு நடிகர் பிரபாஸ் நடித்துள்ள 'பாகுபலி 2' திரைப்படம் வரும் ஏப்ரல் 28ஆம் தேதி உலகம் முழுவதும் பிரமாண்டமாக வெளியாகவுள்ளது. இந்த படத்தின் வசூல் ரூ.1000 கோடியை நெருங்கும் என்று எதிர்பார்ப்பதால் பிரபாஸின் மார்க்கெட் தற்போதே எகிறியுள்ளது.
இந்நிலையில் 'பாகுபலி' படத்தின் பாகங்களுக்காக கிட்டத்தட்ட ஐந்து வருடங்களை ஒதுக்கிவிட்ட பிரபாஸ் இனிமேல் வருடத்திற்கு இரண்டு படங்களில் நடிக்கவுள்ளதாக ரசிகர்களிடம் வாக்குறுதி கொடுத்துள்ளார்.
அதன்படி 'பாகுபலி 2' படத்திற்கு பின்னர் சுஜித் இயக்கத்தில் ஒரு தெலுங்கு படத்தில் பிரபாஸ் நடிக்கவுள்ளார். இதே கதையை பிரபாஸ் கோலிவுட் இயக்குனர் அட்லியிடம் கூறி தமிழில் இயக்க ஆலோசனை கூறியுள்ளாராம். அட்லியும் இதற்கு ஒப்புக்கொண்டதாக தெரிகிறது. இதன் காரணமாகத்தான் பொதுவாக தெலுங்கு திரைப்பட விழாவில் கலந்து கொள்ளாத அட்லி, சமீபத்தில் நடந்த 'பாகுபலி 2' விழாவில் கலந்து கொண்டதாக தெரிகிறது.
தற்போது விஜய் நடித்து வரும் 'தளபதி 61' படத்தை இயக்கி வரும் அட்லி, இந்த படத்தின் படப்பிடிப்பு முடிந்தவுடன் பிரபாஸ் படத்தை தொடங்குவார் என்று எதிர்பார்க்கப்படுகிறது. இந்த படம் தமிழ், தெலுங்கு என இரண்டு மொழிகளில் ஒரே நேரத்தில் உருவாகவுள்ளது.