அட்லியால் தள்ளிப்போகுமா 'வாடிவாசல்'.. என்னதான் நடக்குது?
- IndiaGlitz, [Monday,September 23 2024]
சூர்யா நடிப்பில், வெற்றிமாறன் இயக்கத்தில் ’வாடிவாசல்’ என்ற திரைப்படம் உருவாக இருப்பதாக கடந்த சில ஆண்டுகளுக்கு முன்பு அறிவிக்கப்பட்டது. இருந்தாலும், இந்த படத்தின் அடுத்த கட்ட பணிகள் தொடங்காமல் உள்ளது. இதனால், படம் எப்போது தொடங்கும் என்பது குழப்பமாக இருக்கிறது.
அதே நேரத்தில், தயாரிப்பாளர் கலைப்புலி எஸ்.தாணு மற்றும் இயக்குனர் வெற்றிமாறன் ஆகிய இருவரும் ’வாடிவாசல்’ விரைவில் தொடங்கும் என்று குறிப்பிட்டு வந்துள்ளனர். குறிப்பாக, இயக்குனர் வெற்றிமாறன் சமீபத்தில் அளித்த பேட்டியில், 'விடுதலை 2’ படம் முடிந்தவுடன் வாடிவாசல் பணிகள் தொடங்கப்படும் என்று தெரிவித்தார்.
இந்த நிலையில், ’கங்குவா’ படத்தை முடித்துவிட்டு, சூர்யா தற்போது கார்த்திக் சுப்புராஜ் இயக்கத்தில் உருவாகி வரும் படத்தில் நடித்து வருகிறார். இந்த நிலையில் அவர் இயக்குனர் அட்லியின் அடுத்த படத்தில் நடிக்க உள்ளதாகவும் தகவல் வெளியாகியுள்ளது.
முதல் முறையாக அட்லி மற்றும் சூர்யா இணையும் படத்தை சன் பிக்சர்ஸ் நிறுவனம் தயாரிக்க உள்ளதாகவும், இது சூர்யாவின் 45வது படமாக உருவாகும் என்று கூறப்படுகிறது. ’வாடிவாசல்’ இந்நிலையில், சூர்யா - அட்லி இணைய இருப்பது உறுதியாக இருந்தால், வாடிவாசல் திரைப்படம் மேலும் தள்ளிப்போக வாய்ப்புள்ளது என்று கூறப்படுகிறது.